Hoos a ranca dak di cas na Paradera

Diadomingo atardi

ORANJESTAD (AAN): Algun hende ta indica cu nan a mira algo manera un Hoos a cuminza forma for di halto bay abao, den area zuidoost for di e veld di Caiquetio.

   Varios persona di trempan tabata comenta cu e tempo cu tabata forma riba Aruba durante mainta pa merdia riba e isla, ta uno caminda calor ta combina cu aire humedo y poco biento, y ta cla pa yuda den formamento di hoos.

   Poco despues di 3:00 pm, e hoos aki a cuminza produci sonido duro den e area aki di Paradera.  Hendenan a cuminza tende sonido fuerte, y pafo tabata mira hopi obheto ta zwaai y bay halto.

   Diripiente full un pida dak grandi di un cas na Paradera, a bay halto.  Tur e rij di zink keto bay pega na otro a wordo hisa, y benta un tiki mas dilanti abao.  Solamente e frame di palo bashi a keda riba dak.

   Despues hendenan no a mira ki direccion e Hoos a tuma, pero el a disipa un rato despues.

   Cuerpo di Bombero a wordo yama y a acudi na e cas, pero ora cu nan a mira cu tin nada pa haci relaciona cu rescate, nan a regresa nan base.

   E habitantenan mes a ricibi yudanza di bisiñanan, kendenan a core busca clabo, martieu, trapi, y asina a bay yuda hisa e dak bek riba e cas, pasobra tabatin temor cu awacero lo por cay mas despues.

   Cu tur nan pasenshi nan a haci e trabao di pone e plachinan di zink bek corectamente pa asina e famia por a pasa un anochi bek trankil.  Ningun hende a resulta herida den e odisea espantoso aki.