HoneyPot a lanza videoclip nobo di cancion cu ta un gran promocion pa Aruba

Cantante Chayo Tromp contento cu su composicion

ORANJESTAD (AAN): E siman aki, e grupo musical di ‘HoneyPot’ a lanza un cancion completamente nobo, y DIARIO tabata presente na On The Rocks Café na Playa pa scucha esaki pa prome biaha.

   E cantante principal Chayo Tromp a hiba palabra, y e tabatin un sorpresa extra!  Esey ta e hecho cu ya caba e cancion nobo aki tin un videoclip traha y cla pa wordo estrena tambe.

   HoneyPot ta un grupo musical cu a lanza su mes na 1996, pues ta existi ya pa 26 aña, y semper a sa di domina na Aruba e genero di roots, rock, y reggae.

   Chayo Tromp a divulga cu e cancion nobo, ‘Straight Out The Caribbean’ e biaha aki ta bay sirbi como un promocion pa Caribe y e beachnan pristino cu bo ta haya na e islanan aki.

   Esaki a bira nan di 2ndo videoclip pa 2022, pues por mira cu e maquina di produccion di HoneyPot a start bek, despues di a keda stagna durante e pandemia.  Tromp a mustra cu ora cu nan por a cuminza toca bek, asina a logra genera fondo pa sigui cu e proyectonan.

   Na luna di Maart 2022, HoneyPot a lanza nan prome cancion di 2022, cual ta dedica pa yuda concientiza pueblo pa cu salud mental, cu e cancion “You Don’t Have To Go Away”.  E cancion ey tambe a ocupa puesto di honor di varios Top 20 na Aruba, y ainda e ta na #1 na e emisora di MagicFM.

   Contrario na e cancion lanza na Maart cu hopi a considera como un ‘cancion tristo’, e biaha aki na Juni cu e cancion ‘Straight Out The Caribbean’, ta bin cu e normal upbeat reggae cu fanaticonan di HoneyPot ta costumbra cune.

   “Nos ta hendenan di Caribe, y reggae a nace den Caribe, pesey nos di HoneyPot semper tabata pusha musica, y semper nos tin turistanan na Aruba cu tambe a bira fanatico di e grupo, cu semper ta bin pa scucha reggae,” Chayo Tromp a bisa.

   Pesey e idea mesora pa traha un videoclip a nace pa usa imagennan exclusivo graba na beach, banda di lama, y area turistico.  “Nos kier usa e cancion- y e videoclip aki pa promove Aruba,” e cantante principal a declara.

   E grabacion principal tabata riba rif na Savaneta, y a bay combina cu shotnan fenomenal durante e recien evento di Aruba Hi-Winds 2022.  E videoclip a wordo crea pa e genio Dani Cruz y dirigi pa Marlon Dubero.  A inclui tambe algun imagen graba cu drones pa e maestro Vince Irie.

   Tromp a bisa cu nan ta prepara pa lanza e cancion aki tambe na demas paisnan den Caribe y otro paisnan.  Aunke ya caba varios turista cu ta sigui nan riba social media a expresa nan alegria cu e cancion nobo.

   Sin duda alguno, un bunita cancion, cu imagennan fabuloso cu ta un berdadero showcase turistico pa Aruba.  Pueblo por mira e videoclip na:

www.bit.ly/honeypot2022