Comienso di Juli gobierno lo ricibi rutanan alternativo den cuadro di e maneho pa regula ATV/UTV

Premier Evelyn Wever - Croes:

ORANJESTAD  (AAN)- E siman aki un bes mas a atende cu e tema di ATV/UTV y manera cu ya caba a anuncia, Gobierno tin un comision trahando riba esaki pa mira con por regula e aspecto aki miho. Ta trahando riba rutanan alternativo cu ta den fasenan hopi avansa caba y tambe ta trahando riba e diferente leynan cu mester bin.

            Prome Minister Evelyn Wever - Croes a informa cu un di e leynan aki ta encera crea un categoria nobo di vehiculo cu e tipo di vehiculonan aki por cay bou dje y asina por wordo regula y controla miho. Locual cu ta buscando ta un balansa den: conserva nos naturalesa, tin un vehiculo cu ta sigur y tambe cu por crea desaroyo economico y atraccion cu hopi hende local y turista ta gusta.

            Prome Minister a resumi bisando cu e trabounan ta avansando cu e diferente departamentonan, y prome siman di juli lo cuminsa ricibi e rutanan alternativo, tambe con e leynan ta wordo hinca den otro pa por regula e sector aki miho. E meta ta pa sigura cu e sector aki por sigui opera na un forma sigur pa tur hende, respetando naturalesa y brindando e servicio/actividad na turistanan.