HOH a lansa jingle di fin di aña hunto cu Jeon y Coro Tutti Frutti

* Titulo dedica na Aruba “Salud na Bo Salud”

ORANJESTAD (AAN): Horacio Oduber Hospital tambe ta encanta e sentimento y emocion cu fin di aña ta trece cune y pues pa di 5 aña consecutivo ta lansa su jingle compaña pa un videoclip. Ya ta conoci cu banda di ta profesional den brinda cuido di calidad na comunidad di Aruba y tambe nos bishitantenan, den e 1300 coleganan tin hopi otro talento tambe.

Riba 10 di December pa exactamente 12or di merdia a lansa e jingle compaña pa su videoclip y e biaha aki e artista cu a carga e cantica ta nos artista local Jeon cu a wordo compaña pa nos muchanan di Coro Tutti Frutti dirigi pa e maestra Maybelline Arends-Croes. E jingle ta hiba e titulo: ‘Salud na bo Salud’, cu ta un titulo perfecto pa nos Hospital y loke nos como HOH ta desea henter comunidad di Aruba. 

Desde luna di april ya e titulo di e cancion ‘Salud na bo Salud’ tabata scirbi den e notanan di departamento di Marketing y Comunicacion. E idea di involucra un coro di mucha tambe tabata un deseo grandi y asina a acerca Jeon y di biaha e no a duda pa join e team di HOH hunto cu cu Coro Tutti Frutti pa hunto nan haci magia.

Na luna di augustus a sinta cu Rygel Isabella y un bes mas su talento y creatividad a ser demostra den e tremendo produccion aki. Un jingle cu na comienso ta dunabo un sentimento di nostalgia, emocion y tambe trankilidad, sigui pa ambiente cu gana di baila y celebra!  E letranan ta di nos artista Jeon y sigur den e cancion e la destaca tur loke HOH ta representa. Algun letra di e cancion ta “Si un dia bo ta bo so, Nos ta cuidabo, Y si bo logra, NOS a logra, Nos ta stimabo!” Tambe tin letra cu ta bisa “Hunto nos ta canta, Pa tur hende wak e luz, Nos ta baila, Salud na bo Salud.” 

E resultado di e videoclip un bes mas ta unico ilustrando nos hendenan di HOH cu ta traha laat anochi, nos muchanan hunto cu Jeon cu ta duna un sentimento di nostalgia, nos coleganan cu ta gusta celebra bida y t’ey 24/7 pa cuida bo salud. Un videoclip diferente, creativo y yena di inspiracion pa Aruba completo cu un bes mas tabata den man di e team dinamico di Marketing y Comunicacion di HOH hunto cu Gleison Mateus Moreira. 

Durante añanan anterior HOH a traha cu diferente artista local manera e legendarionan di Grupo di Betico, Rocco Franken y Ataniro y e aña aki Hospital a uni cu Jeon y nos muchanan di Coro Tutti Frutti. Danki, danki y mas danki na nos artistanan local di e aña aki y tur colega cu a participa un bes mas den haci e jingle y videoclip ‘Salud na bo Salud’ un realidad.

Pa disfruta di e tremendo jingle cu su videoclip di 2025 por subi tur HOH su medionan social manera Facebook, Youtube y mas y gosa hunto cu nos!