Centro di Bario Noord a culmina “LET’S ACT Aruba” ciclo 2025

ORANJESTAD (AAN): Diabierna anochi, Centro di Bario Noord a presenta cu gran orguyo e presentacion oficial di “LET’S ACT” Aruba,

celebrando e esfuerso, talento y progreso di tur participante. Despues di algun luna di entrenamento intenso, den un gala cultural yen di energia y emocion, participantenan a subi escenario pa mustra fruto di nan preparacion, representando disciplinanan di Teatro, Canto, Cuarta y Folklore. 

“LET’S ACT” Aruba ta un iniciativa socio-cultural, un colaboracion innovador entre Fonds voor Cultuurparticipatie (FCP) y CEDE ARUBA, diseña pa fortalece participacion cultural den e parti Caribense di Reino. “LET’S ACT” Aruba ta crea oportunidad pa nos muchanan participa den un programa structura, dedica na desaroyo di talento, creatividad y expresion personal. Por medio di guia, mentoria y practica constante, e programa ta fortalese confiansa, disciplina y abilidad artistico den nos muchanan. 

E  anochi  tabata  un  fecha  hopi  mas  special,  mirando  cu  dia  5  di  December,  ta  e gran cumpleaños di Sinterklaas, kende a pasa bishita na Centro di Bario Noord, hunto cu su Pietnan, pa saluda tur muchanan bon mucha presente. Mama Claus tambe a haci acto di presencia, agregando alegria y ambiente festivo na e ocasion. Durante e evento, publico a gosa di un dramatisacion di nacemento di nos kerido “Niño Hesus.” 

Centro di Bario Noord ta expresa un gran danki special na Meneer Rocky y Erwin, pa nan dedicacion, pasenshi y amor den traspasa nan conosemento na nos muchanan. Nan aportacion ta fundamental pa e desaroyo continuo di talento den bario. Danki tambe na tur mayor, tur mentor, y tur hende cu ta sostene Centro di Bario Noord y ta sigui mustra confiansa den Centro. 

Un danki special na Meneer Rocky y Erwin pa nan dedicacion y amor pa traspasa nan conocemento na nos muchanan. Y na tur mayor cu ta brinda Centro di Bario Noord nan confiansa. Tambe, un danki special na Pittbull Singing Production di Ruth Gaarie pa nan bunita  presentacion  durante  e  anochi  aki.  Alabes  nos  ta  gradici  Jermaine  Acosta  y Madelene Kelly y nan elenco pa e dramatisacion di nacemento di nos "Niño Hesus." 

Un gesto hopi aprecia a yega di banda di Elmar, cu a regala e muchanan buki di cuento di Chispito, un spaarpot pa stimula habito di spaar, y un kleurboek tematico—detayenan cu ta contribui na creatividad y formacion positivo. Ademas, Centro di Bario Noord ta mustra su gratitud na Sharp Productions & Entertainment pa nan sponsor di zonido, y na Elmar pa nan give-away items. 

E evento di anochi tabata manera un testimonio di kico comunidad, cultura y union por logra hunto, continuando asina Centro su vision pa sigui stimula e desaroyo, crecemento spiritual, social, cultural y deportivo di e dushi pueblo di noord. 

Centro di Bario Noord—Creciendo Hunto!