Hobennan mayor ta motiva esnan di 17 aña pa sigui pusha den e Trayecto di Formacion Social

Jessy Ras, directora STV, ta comenta:

ORANJESTAD (AAN) — Jessy Ras, directora di Proyecto Formacion Social (STV), a menciona den entrevista cu DIARIO, cu despues di tres siman cu e grupo 17 a cuminza cu e trayecto, nan lo duna un presentacion y nan a bay nan cas den fin di siman.

E hobennan si tabata tin contacto telefonico cu nan mayornan durante e lapso aki. Tin biaha nan tin falta di cas, di famia, etc., anto nan a haya momentonan, durante e tres siman cu a pasa, pa yama cas y puntra con a bay, scucha stem di famia, y haya un push pa sigui cu e trayecto.

“Tin hopi hoben cu e mayornan ta motiva nan pa inscribi na STV. Mayornan ta wak e importancia di e trayecto y ta logra convence nan yiunan pa bin haci’e. Pues, no solamente ta bin di e hobennan pero tambe di e mayornan cu kier miho pa nan yiunan”, Jessy Ras a relata.

Ras a reitera cu STV ta hayando hopi hoben di 17 aña ta bin participa, y un di e motibonan ta cu no tin hopi scogencia eyfo pa nan, sea cu trabao of scol, y STV ta un bon alternativa cu nan por traha riba nan mes, durante un aña nan por haci diferente cos, y siña tambe kico ta un trabao. “Tin hobennan cu kizas no tin experiencia den trabao y den e trayecto nan ta core stage ocho luna largo, unda nan ta haya un tiki mas conocemento kico ta trabao, ken nan ta, y asina nan por ta miho para den nan zapatonan, ora nan keda cla”, Jessy Ras a declara.

El a trece dilanti tambe cu mayornan mester firma ora nan yiu tin 17 aña, ya cu ainda nan ta menor di edad. Pero nan ta varia di edad, tin cu mas di 18 aña y e ta bay bon pasobra e hobennan mayor ta motiva esnan di 17 aña. “Tin hoben di 17 aña cu no sa kico tur e kier haci ainda, y tin hoben di 22 aña cu ya caba ta decidido pakico e tey; y e ta motiva esun mas hoben pa wak mas leu cu awo, pero ta mustre cu e ta bezig pa un bon futuro, pues pa sigui pusha.