Minister di Labor a revela: "Hopi abuso ta tumando luga"
*Hotelnan awor por contrata trahado den forma directo
ORANJESTAD (AAN): Minister di Labor, Integracion y Energia, Glenbert Croes a revela cu actualmente tin companianan, esta uitzendbureau, cu no tin permiso.
El a revela cu niun di e contratistanan (conoci pa algun como contratas) no tin permiso. "Mi no a renoba permiso di niun hende pasobra tin hopi abuso ta tuma luga".
El a agrega cu tin 'uitzendbureaunan' cu si ta serio, pero na otro banda tin hopi cu n' ta serio. Gobierno ta haci di su parti. Pero, por ehempel, hotelnan, caminda tin mester di trahadonan pa haci trabao di entre otro 'housekeeping', tambe mester tuma un decision civico y corporativo di no contrata trahado a traves di e contratistanan ey, pasobra nan no tin permiso.
E comerciante tambe, a bisa, mester haci su parti di no participa den un practica oportunista, di corto duracion. Ta prefera di contrata un trahado via un contratista, un 'uitzendbureau', pa no pag'e loke realmente e tin derecho riba dje, e mandatario a remarca.
Ta tuma un rato pa e hotelnan of esnan cu ta contrata pa realisa cu practicanan asina no ta algo di largo duracion of no ta trece solucionnan permanente, a bisa.
Pa medio di e maneho nobo di gobierno, hotelnan por fin ta contrata e trahadonan directamente. Si un rato, a pensa di contrata e trahadonan via un 'uitzendbureau' pa wak con e trahado ta traha y despues contrata nan directamente, esey ta perfecto. Esey por. "Pero nos mester bisa cu por fin nos ta cuminsa mira cu e hotelnan ta cuminsa contrata e trahadonan den forma directo", e mandatario a splica.
Ya caba a cuminsa wak e tendencia aki cerca e hotelnan y esaki ta un tendencia cu e minister ta aplaudi. Esaki ta trece husticia laboral, husticia humano y un miho relacion laboral, banda di impedi cosnan indebido of practicanan ilegal tuma lugar.
Minister Croes a sigui bisa cu den cuadro di un maneho nobo, ora cu permiso wordo duna bek pa medio di un 'uitzendbureau', un trahado no por gana menos cu salario minimo den su man. Tin 'uitzendbureaunan' cu ta paga e trahado menos cu esey. Esey ta inaceptabel, e mandatario a remarca.
