Skirbi pa Mercedes Monge
Awe, dia 1 di Juni 2022, mi ta recorda cu 30 aña pasa mi trayectoria como parti di e staf di redaccion di Matutino DIARIO, a cuminza.
Henter un bida, sin lugar na duda! Añanan di trabao basta duro, pasobra no tabata cuestion di sinta skirbi henter dia, pero cubri conferencianan di prensa regularmente, haci entrevistanan, duna cobertura na diferente actividad y suceso, loke hopi biaha tabata tuma mi henter e dia. E no tabata facil, pero apasionante.
Na e momentonan ey mi dos yiu tabata den edad escolar y cumpli como mama parallel na mi trabao, no tabata un mision facil, pero tampoco imposible cu Dios su ayudo y e comprension y bon comportacion di mi yiunan.
Eherce mi trabao como reportero tabata y ta un gran pasion pa mi. Mi a sigui e pasonan di mi tata, pero na caminda el a cambia pa su profesion di 'accountant' y a laga periodismo un banda, despues di varios aña. Ami no! Mi a sigui y ta sigui ainda “contra biento y marea” apesar di cierto obstaculo cu mi a haya na caminda e ultimo dos añanan cu tin di haber cu salud, pero unda mi a bolbe experiencia e misericordia di Dios.
Mi semper lo ta gradici na e coleganan cu a acepta mi pa forma parti di nan team: Aureen Werleman, Django, Juby, Nilton, Oscar, Robby (den feliz memoria), Gina, y sigur señor Jossy Mansur, cu a guia mi como un excelente mentor, y señora Nuhad cu a bay di acuerdo pa mi drenta den servicio.
Kico mas mi por a pidi? Ta palabranan di gratitud so mi por tin pa nan tur. Temponan dificil cu a surgi door di covid-19 ta algo cu a golpia Aruba henter y DIARIO no a keda afo, y te ainda ta haci nos dolor, pero nos tey, na pia di e lucha y cu speranza cu dentro di poco, tur cos lo bolbe na normalidad. Trinta aña di servicio ta un privilegio grandi pa mi. Danki famia Mansur, coleganan, henter e personal y lectornan di e corant di pueblo Arubano prome, awe y den futuro!
