ORANJESTAD (AAN): Aruba Lions Club cu mas di 75 aña sirbiendo comunidad tambe tin su hobennan den e LEO Club Aruba cu recientemente a caba di instala nan directiva nobo pa aña 2023-2024.
E hobennan aki durante aña leonistico cu a pasa, a haci diferente proyecto hopi bunita den comunidad y sigur a yena nan CV cu experencianan unico manera charlanan cu nan a ricibi, reuniendo pa hasi actividadnan y siña con pa traha hunto y sigur experencia con ta hasi trabounan voluntario y tambe sirbi comunidad den e mihor forma.
Ta hopi bunita pa mira e muchanan aki entre edad di 12 pa 18 aña, yenando nan tempo liber pa haci actividadnan sano y pa un bon causa, asina demostra e speranza cu den futuro nos tin bon ciudadanonan den nos comunidad.
Den nan ultimo reunion a caba di eligi y instala e directiva nobo cu ta bou guia di Lion Liza Roberts encarga cu e muchanan di e LEO Club Aruba.
Den un votacion a keda eligi como presidente Alysha Roga y su vice-presidente Gjordjan Roga, secretaria ta Catherine Wernet y tesorero Dyron Arends.
Mescos cu directiva di Aruba Lions Club tambe nan conoce otro funcionnan cu a keda pa Nathan Croes tail twister, Shaquille Dirksz LEO Advisor y Lirienne Roga como Membership Chairperson.
Awor ta un aña leonistico nobo caminda e directiva aki lo mester traha riba ideanan nobo pa projectonan pa comunidad y talvez sigui cu locual tin pendiente.
Ta spera di scucha hopi di e muchanan aki durante nan aña pa sigui cu e bon trabou di sirbi comunidad.
Un pabien na e directiva nobo y nos ta manda palabra di motivacion pa nan por tin un aña exitoso.
Aruba Lions Club mescos cu su LEO Club Aruba kier a haci un invitacion na tur mayor cu ta desea pa nan yiu join e LEO Club Aruba, por yama cualkier miembro of via Facebook pa haya mas informacion of por tuma contacto cu Aruba Lions CLub.
Un hoben mas cu ta siña pa haci actividadnan sano, tin sigur di ta un bon adulto den futuro pa un bon comunidad.
https://diario.aw/categories/noticia/general/hobennan-di-leo-club-aruba-cu-directiva-nobo#sigProId91ffc1c4d5
