ORANJESTAD (AAN): Desde Dialuna 1 di December 2025, Bureau Ombudsman a habri porta pa por brinda servicio na comunidad.
Trayecto amplio: Papiando di e trayecto amplio te cu 1 di December 2025: Despues di a nombra mr. señora Jurima Bryson como e prome Ombudsman di Aruba 1 di October 2024, inmediatamente a cuminsa cu preparacion pa por instala e oficina y forma e team di Bureau Ombudsman. Cu dedicacion di e team, ayudo local y internacional, Ombudsman di Aruba a logra pone un fundeshi firme den un tempo relativamente corto pa un institucion encarga cu trato di keho di comunidad den forma independiente y imparcial.
Servicio di Bureau Ombudsman: Desde 1 di december 2025, e ciudadano por acerca Bureau Ombudsman ora nan tin un keho contra un instancia. Den cuadro di e Ley ‘Landsverordening Ombudsman’, un ciudadano por entrega un keho contra e siguiente instancianan: (*) Organonan administrativo. (*) Entidadnan huridico cu gobierno a institui. (*) Companianan estatal. (*) Organizacionnan priva cu tareanan di interes general y cu ta ricibi placa di gobierno. (*) Organizacionnan priva cu ta ehecuta tareanan cu mucha y hoben (tur persona te cu 17 aña) riba tereno di enseñansa, ayudo y guia, cuido, cuido medico. (*) Tur e empleadonan di dicho instancianan, hasta si e relacion di trabao a termina caba.
Prome cu e ciudadano por haci uzo di e servicio di Bureau Ombudsman, tuma nota di esaki. Tur hende por entrega un keho contra un instancia segun Ley cerca Ombudsman. Ademas, pa por entrega un keho cerca Ombudsman, e ciudadano mester a entrega su keho cerca e instancia concerni prome. Si esaki no a sosode, no por haci uzo di e servicio di Bureau Ombudsman ainda.
Informacion general: Bureau Ombudsman ta habri di dialuna pa diabierna como lo siguiente:
Dialuna y Diabierna, sin cita entre 8:30 am pa 11:30 pm. Cu cita entre 2:00 pm y 3:30 pm.
Diaranson, sin cita entre 8:30 am pa 11:30 pm. Merdia ta cera pa publico.
Diamars y Diahuebs, cu cita entre 8:30 am pa 11:30 am. Sin cita entre 2:00 pm y 3:30 pm.
Bureau Ombudsman ta situa na Caya G.F. Betico Croes 149, na Playa. Nan telefon ta 281-6800, y nan email ta This email address is being protected from spambots. You need JavaScript enabled to view it.. Por entrega un keho directamente via e portaal di Ombudsman via e website di ombudsman.aw
Danki na comunidad: Señora Bryson y su team kier gradici comunidad pa e palabranan di motivacion y actonan di apoyo den e ultimo aña. Comunidad tabata warda pa e momento importante aki pa hopi aña y cu esaki na mente, Bureau Ombudsman a haci su maximo esfuerzo pa por inicia cu brinda servicio lo mas pronto posibel. Sin nos comunidad, nos no tin e Colegio Maximo di Estado nobo aki (nos Ombudsman, nos Defensor di Pueblo).
