Publico por acudi Diasabra mainta na Centro di Bario Noord
ORANJESTAD (AAN): Centro di Bario Noord ta comparti cu hopi orguyo y alegria cu e ta e prome centro comunitario cu lo ricibi e conocido escritor y historiado Sr. Dufi Kock pa un encuentro special di firma di buki. E evento ta marca un momento historico, pasobra Sr. Kock a scoge Centro di Bario Noord como e prome lugar unda e publico por conoce y haya su dos publicacionnan nobo.
E dos obranan nobo ta dedica na preservacion di nos historia nacional y ta ofrece un rikesa di informacion tocante Aruba, Lago y e influencia historico cu a forma nos comunidad durante hopi decada. Centro di Bario Noord ta honra cu un autor di e caliber aki a pone su confiansa den e centro pa comparti su ultimo trabounan cu comunidad.
Dufi Kock ta anuncia cu su dos bukinan a sali oficialmente na imprenta danki na sosten exclusivo di MetaCorp.
Prome buki: E prome publicacion, “Seccion Historico di Aruba”, ta consisti di un edicion extenso di 310 pagina cu no menos cu 136 topico historico. E buki ta resultado di mas cu 33 aña di investigacion, recopilacion di documentonan historico y un compromiso continuo pa documenta e historia di Aruba tanto na Papiamento como na Ingles.
Segun e autor, e publicacion no solamente ta un testimonio di nos pasado, sino tambe un legado cultural pa generacionnan futuro. E ta invita lectornan pa aprecia e historia di nos isla y comprende miho con nos identidad a wordo forma door di eventonan, personahenan y desaroyonan historico.
Otro buki: E di dos publicacion, “Mision di Marineroanan Noruega”, ta relata e rol importante cu Norwegian Seamen's Mission a hunga den San Nicolas durante e periodonan cu Lago Refinery tabata ricibi miles di marineronan di Noruega. Den solamente 27 pagina, e autor ta ilumina un capitulo unico di nos historia cu hopi hende ainda no conoce, pero cu a tin un impacto importante riba desaroyo social y cultural di Aruba.
Centro di Bario Noord ta kere firmemente cu e promocion di historia y cultura ta un inversion den futuro di nos comunidad. Door di ricibi un autor manera Dufi Kock, e centro ta sigui cumpli cu su mision di crea espacio pa educacion, dialogo y enrikecemento cultural pa henter comunidad.
Topa cu e autor: E firma di buki lo ofrece residente di Noord y Aruba e oportunidad unico pa cera conoci personalmente cu e autor, papia tocante su investigacion y adkiri un copia firma di e dos publicacionnan historico. E ta un ocasion especial pa studiantennan, docente, investigadornan, amante di historia y cualkier persona cu tin interes den e patrimonio cultural di Aruba.
E firma di buki lo tuma luga durante "Nos Mercado", e mercado semanal di Centro di Bario Noord unda bishitantenan por haya productonan fresco traha localmente aki na Aruba. Esaki ta brinda comunidad e oportunidad pa combina un mainta di cultura, historia y sosten na emprendedornan local.
Centro di Bario Noord ta invita tur miembro di comunidad pa tuma parti den e evento special aki y celebra hunto e lansamento di dos obranan cu, sin duda, lo bira un aporte importante na conservacion di nos memoria historico.
E evento lo tuma luga mañan Diasabra 1 di Augustus 2026, for di 9:00 am te cu 2:00 pm.
Cu iniciativanan manera esaki, Centro di Bario Noord ta reafirma su compromiso di sigui fomenta educacion, cultura y orguyo pa nos identidad Arubiano.
Centro di Bario Noord ta expresa su mas sincero gradicimento na Sr. Dufi Kock pa a scoge e centro como e prome lugar pa presenta oficialmente y firma su bukinan nobo. E ta un honor cu lo keda graba den historia di e centro y un inspiracion pa sigui promove conocimento, cultura y amor pa Aruba.
