ORANJESTAD (AAN): Jurette Croes di DVG den un entrevista cu DIARIO a elabora riba nan campaña di conscientisacion ‘Un accion chikito cu efecto grandi’ cu ta andando actualmente.
Aruba ta den temporada di yobida cu normalmente ta entre juni pa november. Sinembargo debi na e acontecimento di El Niño, lo tin un temporada seco. Sinembargo sporadicamente, casi tur dia cierto areanan na Aruba ta haya tiki awa.
Segun Croes, e tiki awa aki cu ta cay, ta trece preocupacion na DVG pa motibo cu sangura no tin mester hopi awe pa nan pone nan webonan y broei. El a menciona cu cualkier tiki awa cu keda den bleki, of otro artefactonan cu por contene awa, sea rond di cas of den mondi, ta un potencial criadero di sangura.
Pa e motibo aki tambe, el a subraya cu e Departamento Gele Koorst en Muskieten Bestrijding (GKMB) di DVG ta sigui cu controlnan y ta cana den barionan y ta informa habitantenan con pa cuida rond di cas. Tambe nan ta controla plasnan di awa riba luganan publico y rioleringnan.
Di parti di ciudadanonan mes, e departamento ta haya hopi keho criaderonan di sanguranan Aedes aegypti cu ta broei den awa limpi y ta transmiti malesanan manera Dengue, Chikungunya y Zika. Tambe nan ta haya keho di casnan cu tin posnan habri na unda sanguranan ta broei na cantidad den awa sushi cu no ta transmiti malesa pero ta causa hopi molester tanto pa e cas como pa bisiñanan mas cerca. DVG ta recomenda pa tene e posnan cera pa no causa e molester aki.
Señora Croes a remarca cu DVG tin un campaña di conscientisacion tocante e sangura Aedes aegypti cu si ta peligroso pa comunidad, cu ta transmiti e malesanan aki. E nomber di e campaña ta ‘Un accion chikito cu efecto grandi’ pa recorda cada ciudadano cu no ta costa mucho pa cana rond despues cu awa yobe y basha tur awa cu ta keda den bleki, baki, coy hunga, botter, cups, bou di tayo di pochi di mata, entre otro.
“Nos a haya informacion di GKMB cu nan a tuma nota cu durante cu nan ta cana rond, no tin hopi sangura y nan no ta haya hopi criadero di sangura. Y nos ta encurasha comunidad pa sigui cu e trabou di sigui basha awanan afo cu ta keda den varios articulo rond di cas”, señora Croes a expresa.
El a duna di conoce cu GKMB a tuma nota cu den barinan pa acumula awa, nan a haya tiki awa den esakinan cu ta suficiente pa sanguranan broei. Ta pidi pa e ciudadanonan aki cu ta pone bari pa acumula awa, pa controla esakinan aunke cu awa ta yobe tiki den e temporada aki.
