Hilton a celebra un Siman di Aprecio pa Empleado

ORANJESTAD (AAN):  E Siman di Aprecio pa Empleado organisa anualmente a wordo diseña e aña aki pa fortalece e interaccion entre coleganan y miembronan di gerencia.

E programa diverso di entretenimento tambe a wordo traha cu e meta pa crea conexion emocional entre e participantenan, cual na su turno ta resulta den un union hopi mas fuerte entre individuonan y un sentido di satisfaccion laboral hopi mas grandi.

            E eventonan di e siman a wordo planea pa mas cu simplemente maneranan pa pasa leuk. Nan a wordo formula pa permiti cu por comparti tempo hunto, brindando oportunidadnan amplio pa por disfruta momentonan special cu coleganan mientras ta participa den diferente actividad.

            “Cada un empleado ta un ehempel bibo di Hilton su imagen di hospitalidad, ora cu nan ta trata cu nos bishitantenan y cu otro, compartiendo e amabilidad y luz di hospitalidad,” General Manager Lawrence Tuck a bisa, “y un bes pa aña durante Team Member Appreciation Week, nos ta percura pa nan pasa bon y sinti e aprecio distincto y personal cu nos tin pa nan.”

            E siman di aprecio a inicia na e entrada di e area di empleadonan cu un delicioso desayuno, sigui pa Bolas Criollas na Papaya Ranch, Kickball & Domino na Centro di Bario Noord, Crazy Bowling na Eagle Bowling Center y un evento pa celebra Dia di Tata na Laguna Coffee Shop, tambe un Hike na Black Stone Beach desde Natural Bridge durante bahada di solo.

            E actividadnan durante e siman aki tabata perfectamente den liña cu e compania su balornan, centralisa riba sirbiendo hende y continuamente invertiendo den bienestar di su empleadonan pa sigura satisfaccion laboral continuo. Durante e siman aki, organisa pa Departamento di Recursonan Humano, nan ta ricibi un extra nivel di reconocemento, reflehando e compania su compromiso na exito y interaccion di su forsa laboral.

            Segun e organisadonan, e empleadonan a pasa hopi bon mes cual no solamente a eleva nan spirito pero sigur a fortalece un poco mas nan conexion cu e compania mes. E interaccion positivo refleha pa e empleadonan ta un indicacion di e compania su dedicacion na e crecemento y bienestar general di su forsa laboral.