ORANJESTAD (AAN): Cursistanan cu a sigui e curso ‘Skirbimento creativo’ (Avansa) na biblioteca a haya nan certificado awemainta.
Riba potret por mira Tony Pareho, Stephanie Croes, Ludwina Perez, Adelaida Ponson, Vi Frank jr. (docente y autor), Ida Philomena Croes, Ann Angela, Noris van Lis-Donata y Dominico Werleman. Nan a keda contento y satisfecho y nan a siña hopi. Lo tin un otro curso Avansa na october 2023. Esaki ta dura 8 siman y lo ta dialuna atardi di 5or pa 7or. Si bo ta interesa por manda un email na This email address is being protected from spambots. You need JavaScript enabled to view it. pa registra of mas informacion.
Biblioteca Nacional Aruba su meta ta pa stimula lesamento na Aruba y duna acceso na un coleccion di buki na diferente idioma y informacion riba un variedad di topico. Biblioteca tambe ta stimula educacion continuo y ta pesey ta ofrece curso y tayer pa adulto.
Miembrecia gratis pa tur mucha y hoben: DIARIO a haya sa cu Biblioteca a introduci miembrecia gratis pa tur mucha y hoben bou 18 aña. Biblioteca ta invita tur mayor bay biblioteca cu nan yiu y haci nan miembro di biblioteca! Pakico? Pa tur mucha y hoben por explora un coleccion grandi di storia y buki riba tur topico of lesa revista.
Biblioteca ta ofrece tambe un coleccion di Ebooks y Audiobooks. Tin hopi espacio pa traha riba computer, busca informacion riba Internet y ademas tin WI-FI gratis pa por usa bo Smartphone, tablet y laptop. Pa registra como miembro por fabor hiba un ID valido.
