Henter edificio di Reina Beatrix School y Juliana School lo wordo renoba

ORANJESTAD (AAN): Den pasado a tende di Gobierno anterior cu e edificio di Juliana School no por wordo renoba,

debi cu tin interes pa cumpra e edificio y tereno pa un meta completamente diferente.

   Pero Gobierno nobo a dicidi, cu nan no ta bay laga e scolnan aki cu a duna miles di Arubiano nan educacion y diploma, bay perdi asina.  Hopi hende ta pasa tur dia ey dilanti y mira con e edificionan ta deteriora.  Kende por corda cu hasta anochi, tabatin les di Karate y Taekwondo den e Gymlokaal.

   Gobierno recien a bisa, cu despues di a keda bandona y deteriora pa varios aña, awo ta toca turno pa renoba e scol historico aki. E renobacion ta duna nos muchanan un ambiente mas sigur, moderno y inspirante pa siña y desaroya, reforsando asina e base di un futuro exitoso pa Aruba.

   Inverti den educacion ta inverti den fortalece e prosperidad di nos pais.

   Diaranson atardi, cu hopi felicidad y orguyo nan a anuncia restauracion y renobacion di Reina Beatrix School y Juliana School, marcando apertura di e oficina oficial di Monumenten Planning Bureau.  Nan a devela e borchi pa e oficina.

   E scolnan aki ta yena di nostalgia, memoria bunita y formacion di hopi ex-alumnonan, (ex-) cabesantenan y docentenan.  Pa comunidad, e restauracion aki tin un gran significado: un simbolo di perseverancia, aire fresco y un era nobo pa nos mucha- y hobennan.

   Ademas di presencia di Ministro President Eman, y tambe Ministronan Gerlien Croes y Rene Herdé, tabatin tambe varios Parlamentario, y tambe ex-cabezantenan di e scolnan, e.o. Meneer Eddie Croes (cabezante Juliana School), Dolf Kock (cabezante Juliana School), Meneer Tautelbaum (cabezante Reina Beatrix School).  E edificio di Juliana School a wordo construi na 1941, y a keda cla un aña despues.  Na 1951 a dicidi traha edificio adicional como expansion pa Juliana School.  E edificio adicional ey awendia ta conoci como Reina Beatrix School.