Gobierno pendiente pa e situacion den region
ORANJESTAD (AAN): Prome Minister Mike Eman a duna di conoce cu un biaha mas a pidi reunion cu tur autoridad envolvi riba seguridad nacional di Aruba, pa asina haya un update riba e situacion actual den region.
Diamars merdia a tuma luga un briefing importante cu commandeur Walter Hansen, Commandant der Zeemacht den Caribe, hunto cu Prome Minister Mike Eman, Conseho di Minister, acompaña pa Secretario General di Ministerio di Asunto General Robert Candelaria y Secretario di Conseho di Minister Indra Duarte, representante special di Directie Buitenlandse Betrekkingen, Annemarie Verrijp (DBB), Director di Directie Buitenlandse Betrekkingen (DBB) Jocelyne Croes y Director di Veiligheidsdienst Aruba Juri Nicolaas (VDA) riba e situacion entre Merca y Venezuela.
E reunion a duna un bista cla y detaya riba e situacion di seguridad regional y su posibel efecto riba e islanan Aruba, Corsou y Boneiro.
Gobierno ta aprecia e trabou y dedicacion di tur autoridad envolvi, cu ta yuda pa mantene pas y seguridad den region. “Pa e seguridad di nos isla, nos ta depende di e autoridadnan competente di nos pais”, Eman a indica.
