Henny Leo como pionero den Dragracing a ricibi Condecoracion Real

ORANJESTAD (AAN): E ta un logro grandi pa esnan na Aruba cu di principio a lucha pa asina pone deporte di Dragrace riba pia! 

Esey ta e hecho ora cu Diamars mainta, e conocido Hendrik F. Leo a wordo condecora como Lid in de Orde van Oranje-Nassau door di Rey Willem-Alexander.

   El a ricibi esaki for di man di Gobernador Alfonso Boekhoudt.  Esaki sigur ta e cherry riba e bolo, y un homenahe bon mereci na e gran Henny Leo, un di e pioneronan den mundo di Dragracing na Aruba.  Y e hecho cu aña pasa el a observa su di 50 aniversario den mundo di careda na Aruba.

   Hendrik Leo a nace na Aruba dia 28 di October 1939 na Plantage Sividivi cerca di Hospital Bieu na Playa.  Gran parti di su bida el a traha como chauffeur di Truck y mecanico.  For di edad hoben caba e tabatin pasion pa motor, esta tur internal combustion engine pa auto, brommer, motorcycle, etc.

   Awor cu e tin 82 aña di edad, e ta corda tempo e tabatin 13 aña di edad caba el a cuminza traha riba auto.  E tabata reta su mes pa purba start un auto.  Despues e tabatin suerte cu el a haya amigonan di su tata cu tabata mecanico, incluyendo un bodyman cu tabata nan bisiña, y nan a acept’e cu den fin di siman Henny ta bay na nan shap pa siña haci algo cu autonan.

   Di eynan su amor pa motor a crece, te cu na 1963 a logra pa lanta e prome Asociacion di Auto na Aruba, y esey a bira Asociacion ARA, cu a bin cu e meta pa crea un pista di careda riba e isla aki.

   Na aña di 1971, Leo’s Racing Team a yuda lanta Fundacion Stichting Aruba Motor Sports (SAMS), cu mesun amigonan den e maneho, cu a purba tur forma pa traha un pista.  A trata prome na Lagabena, pero como cu e tereno ta chikito, autoridadnan na aña 1971 a stop nan.  Cada rato diferente gobierno a priminti nan di lo yuda haya un tereno, pero a keda warda, y warda y nada a socede.

   Mas di un decada despues, esta na 1983 porfin Gobierno a ofrece tereno di Palo Marga, cu a bira realidad danki na Leo’s Racing.  A traha riba e pista aki y asina poco poco a keda mantene y expande te na loke e ta awor.

   Henny Leo a splica cu e ta sumamente satisfecho cu e logronan di su team.  Tabatin victorianan grandi cu Leo’s Racing a sa di celebra cune. Dado momento ta tur hende riba e isla aki conoce Leo’s Racing y su vehiculonan.  Pero pa Henny Leo, e logro di mas grandi ta e hecho cu un di nan vehiculo traha na Aruba, a sali grandemente riba portada di revista “Super Stock” imprimi na Merca y cu a bay rond di mundo.

   DIARIO como tambe e columna di Speedworld ta felicita Henny Leo, su famia, y tur esnan cu a forma parti di Leo’s Racing Team, cu e merecido homenahe y condecoracion aki.