Salida di 2021 y entrada pa 2022 a bira reto mundial grandi --- *Placa pa cambio di clima ta topa cu gastonan grandi di Covid-19 --- *Desaroyo mundial ta tranca pa hende cu exigencia material halto
ORANJESTAD (AAN)- Hende a prepara su mes pa un futuro cu exigencia material sumamente halto.
E costo di bida basico di hende a bira sumamente costoso pa e hende mes y pa su comunidad.
Mucha ya kier nan propio telefon cu ta exigi pa e pais tin un sistema di telecomunicacion cu continuamente ta wordo adapta na su exigencia nobo.
E exigencianan material di hende a wordo crea den un tempo cu hende a pensa cu e tin tur capacidad pa atende cu futuro den su man.
Na 2019 DIARIO a presenta e problema grandi di hende di e tempo. Na 2019 ainda hende tabata puntra su mes, kico lo pasa den futuro cercano ora tecnologia lo ta asina avansa, cu hende mester mira con e ta mantene su lugar den mundo.
Den creacion di e futuro describi, hende no a pensa cu un virus lo por cambia e futuro cu hende a tuma como garantisa.
Na salida di 2021 y entrada pa 2022 ta un hecho cu hende no tin e control cu el a pensa riba e mundo cu e mester construi pa futuro.
Placa pa atende cu cambio di clima y exigencianan nobo di Covid-19 ta haci cu gobernacionnan rond mundo mester repasa nan cifranan y mira con nan ta duna contenido na un futuro cu retonan cu nan no a tene na consideracion.
Cambio di clima mester haya atencion mescos cu tur e cambionan cu e ta exigi y cu ta nifica gastonan enorme pa comunidadnan y mundo.
E placa pa e inversionnan mester wordo produci dor di paisnan y hende cu mester paga tambe pa atende cu e resultadonan di Covid-19, cu a kibra planificacion mundial.
Hasta gastonan pa 2022 ta bira dificil pa calcula mientras no ta conoci kico e saldo final di e enfermedad, cu por conoce resultadonan sumamente dramatico ainda, lo ta.
Comunidad mundial mester tene na cuenta cu cantidad di pashent di Covid-19 lo exigi mas di cuido medico cu originalmente a wordo planea.
2022 ta habri porta pa un epoca di retonan grandi den cual hende lo mester revisa tur plan cu e tin.
Situacionnan humanitario rond mundo ta bay exigi mas atencion. Kico ta haci cu e refugiadonan politico y social cu rond mundo ta aumenta den cantidad?
Ya durante 2021 por a nota e dificultad pa duna yudansa na hendenan cu no por keda nan pais y mester a haya refugio na paisnan cu mester a percura tambe pa nan biba na un forma cu nan no ta bira victima di Covid-19.
Tin un mundo nobo na caminda. Un mundo cu a wordo planifica casi di maraviya cu paisnan poniendo fecha pa tur loke nan kier alcansa.
Pa Nacionnan Uni 2030, cu ta yega tur dia mas cerca, ta e inicio di e mundo nobo cu a planea na 2015 ora hende no por a mira Covid-19 yega.
Kico lo pasa?
Retonan grandi ta spera. Reto sigur grandi pa hende cu den e desaroyo tecnico a adapta su mes na un forma nobo di bida, cu ta exigi placa.
Placa cu tur dia ta bira menos cu atake di Covid-19 riba produccion mientras gastonan a aumenta!
