ORANJESTAD (AAN): Stichting Ambiente Feliz, un fundacion pa persona cu limitacion intelectual of multiple, a lansa un website completamente nobo.
E fundacion, cu ta consisti di 2 localidad y ta ofrece cuido residencial, a lansa nan prome website na aña 2016. Comunidad a ricibi e oportunidad pa ser conoci cu nan grupo di meta y e servicionan cu nan ta ofrece.
E fundacion a expande na aña 2021 cu un localidad nobo y a celebra nan 35 aña di existencia na aña 2021 na unda nan a presenta nan logo nobo. Pesei a dicidi di traha ariba un website nobo cu a wordo lansa ariba 1 di maart.
E website www.stichtingambientefeliz.com ta wordo presenta den un forma mas moderno y facil pa e usuario. Den e menu por haya diferente contenido nobo yena cu mas informacion. Por lesa entre otro informacion di e fundacion, noticia actual, con pa hasi un peticion pa cuido residencial, con pa acudi como studiante of boluntario, vacatura, con pa yuda e fundacion por medio di un donacion, contacto y mucho mas.
E website ta den Hulandes. E intencion ta pa lansa esaki despues tambe na Papiamento. E fundacion ta invita comunidad pa bishita nan website pa asina keda na altura di e fundacion y e servicionan cu nan ta ofrece.
