Miangela Ras, director di CEDEHM:
ORANJESTAD (AAN) – Miangela Ras, Director di Centro di Desaroyo di Hende Muher (CEDEHM), den un entrevista a expresa cu nan ta hopi orguyoso di traha pa yuda e hende muher y tur loke ta empodera hende muhe.
El a señala cu nan ta mara na e tratado di CEDAW (Comision contra Discriminacion di Hende Muher) y pesey e instancia aki tey, pasobra cada pais cu a ratifica mester tin un “Gender Machinery” anto CEDEHM ta e departamento gubernamental, cu ta zorg pa esaki, y e ta haci hopi cu e medionan cu tin.
Pues, nan ta realiza proyectonan, sesionnan di grupo, y hendenan muher local ta wordo empodera. Aña pasa nan a desaroya un proyecto piloto “Reten” cu a resulta hopi exitoso, y cu e aña aki ta sigui cune, riba peticion di hende muher mes.
Esaki ta un concepto pa hendenan muher intercambia nan conocimento, locual ta hopi importante.
Ras a indica cu hende muher ta multifacetico, sernan cu tin diferente faceta, na mesun momento cu hende muher ta “going on” e ta profesional, mama, yiu, bisiña, y ta haci trabaonan no remunera, y esaki ta hopi pisa riba hende muher.
E reto cu CEDEHM tin, ta concientiza cu trabao di cuido no tin genero, pero mester ta parti den mesun forma. E no ta cu un homber ta babysitter su yiu, den un caso asina. E ta cu e ta wak su yiu! Pues, mester cambia e mentalidad cu tur trabao di cuido ta cay riba hende muher, anto hende homber ta yuda. “No, e no ta yuda. Ta su deber tambe. Miangela Ras ta wak esaki en e sociedad completo y e ta inter generacional, pasobra nos a wordo lanta asina. E dama a agrega cu tin tanto rol di hende muher, cu no necesariamente ta mara na genero di ta muher.
Tin un reto hopi grandi, y esey ta e enfoke di e aña aki. Pa hende muher ta inclui den tecnologia. Y ta importante pa fomenta den nos muchanan muher cu nan tambe por bay den careranan tecnico, cu nan tambe por bay den I.T (Informacion Tecnologico). Mayoria di I.T ta hende homber, pero e ta pasobra hende muher no ta wordo encurasha pa bay den carera tecnico, of e no kier bay den e direccion aki. E ta un reto cu bal la pena pa asumi.
Aruba tin e bentaha di ta un isla chikito, no tin e partinan rural, manera ora Miangela ta atende conferencianan internacional, tin paisnan unda no tin internet y hendenan muher y mucha muher no tin manera pa desaroya nan mes den tecnologia. Na Aruba por bisa cu internet y digitalisacion ta accesible, pero e hende muher mester wordo encurasha no solamente pa participa, pero tambe pa sa con pa navega tur e tools cu tin na su disposicion.
