ORANJESTAD (AAN): E siman aki, despues cu a purba tur sorto di forma y recurso pa clientenan yega na un areglo di pago pero toch a haci nada,
e compania WEB Aruba NV a cera meter di algun cliente, y pa esaki a usa un sorto di yabi/pin special cu ta wordo poni na e valve di e meter.
E pin aki cu ta wordo poni na e valve ta uno special di WEB Aruba NV, y mester di un herment special pa habri e PIN aki.
Robert Croes kende ta Sector Manager di Distribucion di Awa na WEB Aruba NV, ta haci un suplica na clientenan pa nan mes no bay trata di habri esaki.
Pa bira mas moderno, WEB Aruba NV ta pidi e cliente pa acudi na e MFA di mas cercano pa haci pago. Despues saca un potret di e pago y mande pa WEB Aruba NV pa asina nan por actua rapido y kita e pin pa e meter habri bek y ciudadano na cas tin awa atrobe.
Antes e tabata un trabao mas grandi, esta di kita full e meter pa ora di tene e accion aki. Pero awor ta djis un PIN special ta pone na e valve, y ora cu e cliente haci pago, ta djis kita e PIN usando herment special.
Ora cu WEB kita e PIN, como protocol nan lo laga e valve cera. Pues e cliente tin di corda pa e mes tambe bay na e meter pa habri esaki bek.
