Parlamento no por acomoda personanan den problema cu autoridad --- *Serlimar ta proba responsabilidad di Aruba pa compania di estado --- *Acuerdo cu Reino y recuperacion di Aruba ta responsabilidad grandi
ORANJESTAD(AAN)—Na 2022 Parlamento di Aruba sigur lo ta den noticia pa diferente motibo cu den historia di Parlamento ainda no a wordo presenta.
Diferente desaroyo relaciona cu Parlamento na 2021, a haci cu na 2022 Parlamento mes ta prioridad cu mester aparece riba agenda hunto cu casonan serio relaciona cu e gobernacion di Aruba.
Kico ta Parlamento? Un pregunta cu normalmente ta wordo contesta cu cantidad di argumento cu actuacion di demasiado Miembro di Parlamento a destrui.
Ora sigui un reunion di Parlamento, e prome palabra cu ta bini na mente ta e palabra Frances “Parler” (papia), cu ta e mihor arte cu ta wordo presenta den loke ta representacion di Pueblo.
Palabranan y teorinan ta wordo expresa cu un show di inteligencia creciente, cu den hopi caso lamentablemente no ta presente.
Na 2022 Parlamento di Aruba sigur lo ta den noticia pues pa e caso historico di Benny Sevinger, cu casi a exigi pa crea un cel di detencion den sala di reunion di Parlamento ora e kier a drenta como detenido den e sala di reunion.
Na 2021, Parlamento di Aruba no a duna un ehempel na hubentud.
Na 2021 nos mester a defende e instituto “Parlamento” contra Reino Hulandes, cu kier introduci medidanan pa scapa Aruba di problema financiero, cu ta mishi cu autonomia di Aruba.
Tin motibo fundamental pa bay contra e posicion Hulandes pero tin comprension tambe pa e hecho cu e nivel di Parlamento y resultadonan directo di politica hunga den Parlamento cu a sostene crisis financiero di Aruba na 2017, a duna Hulanda un porta pa e habri.
Na 2022 tin asunto importante ta spera Parlamento y tur atencion sigur mester wordo dedica na e situacion di Serlimar cu ta duna prueba cu companianan di Gobierno no por ta completamente independiente di Pueblo.
Serlimar ta duna prueba cu ora e bom rementa, Pueblo ta keda responsabel pa loke mester pasa.
Awe no ta dirigente di Serlimar pero representantenan di Pueblo mester dicidi con ta soluciona e dolor di trahadornan y tur cu a wordo perhudica dor di wega politico na Serlimar, caminda sushi ta yena lama.
Serlimar tabata destina pa bancarota y asina pa benta? Un pregunta serio ora observa e forma cu a atende cu e compania cu ni cu e 1.6 Biyon cu a spart na tram y fiestpad, no a haya atencion.
Desaroyonan na WEB, na Refineria di Aruba ta duna prueba cu companianan di Gobierno no por ta riba nan mes sin mas.
DIARIO a defende e thesis cu tur propiedad di Pueblo di Aruba mester wordo supervisa pa Parlamento como representacion di Pueblo.
2022 ta marca un epoca nobo pa Aruba, cu ta mara na un acuerdo cu Reino pero tambe mester conoce reconstruccion despues di un pandemia, cu ainda no ta tras di lomba.
Parlamento como representacion di Pueblo, mester duna prueba cu e ta representa, dignidad, moral y inteligencia di e Arubiano cu a hiba un lucha tenaz pa Status Aparte entrega Aruba su propio Parlamento na bienestar di Pueblo di Aruba, cu e mester representa pero cu honor!
