ORANJESTAD (AAN) – Señora Solangel Dinmohamed-Lacle, di partido MAS, a duna un relato hopi extenso di locual a sosode cu su persona, despues cu e votonan individual a wordo conoci, y cu el a saca 189 voto cu tabata mas cu number 2 (Aquanette Gunn) y cu e candidato number 3.
Esaki relaciona cu e protocol cu tur candidato a firma, pero na final ta parce, legalmente e no tin balor.
Siguiendo cu e video cu señora Gunn a publica cuestionando su colega di partido, Solangel a bisa cu na final señora Gunn a puntra ki garantia Partido MAS tin di su integridad y honestidad.
Solangel ta kere cu awe, Aruba ta haci señora Gunn e pregunta aki. “Ki garantia nos tin como pueblo cu bo ta un persona integro y honesto; pues tene cuenta cu esaki ta palabranan cu bo no por bolbe uza sin cu bo wordo cuestiona”, Solangel Dinmohamed-Lacle a remarca.
E dama a sigui splica cu e no a reacciona prome no pasobra e señora tin razon, ni miedo, ni falta di argumento pasobra tin suficiente argumento pa contradeci locual Gunn a bisa den e video.
“Pero e motibo pa cual mi a scoge pa ta prudente, ta pasobra mi a laga señora Lopez-Tromp asumi su rol di lider; pues el a indica cu e ta un bon lider, un bon politico, un persona integro, un persona cu lo para na banda corecto di husticia. Nunca nada di locual a wordo papia den e video a wordo treci dilanti, durante e campaña”, Solangel a comenta.
El a indica cu despues di a ricibi diferente yama di siguidornan y di prensa, el a tuma contacto cu Lopez-Tromp y a manda un carta na bestuur y na cada candidato di Partido MAS. Den e carta aki el a pidi aclaracion riba e protocol y tambe e video unda e ta sali difama su persona.
Solangel a bisa cu como un candidato hoben y como politico nan a pidie pa silencia pueblo di Aruba. “Nan a bisa mi cu mi mester a sali dilanti bisa mi seguidornan y hende cu mi no conoce mes, pa no haci comentario negativo riba Partido MAS ni riba señora Gunn. Ami ta pensa cu pueblo no mester wordo silencia. Ami no lo silencia pueblo, mi no a hacie y mi no lo hacie nunca tampoco”! Solangel a expresa.
El a agrega cu pueblo mester ta critico, mag di puntra y mag di cuestiona, Aruba ta un pais democratico y nos ta den pleno siglo XXI. El a haya straño cu un medio di comunicacion a post un articulo papiando di su persona, como e di dos candidato cu lo drenta Parlamento, pero e articulo aki a wordo kita den menos di dos ora. “Eynan nos ta wak e poder cu algun politico tin riba algun medio di comunicacion” Solangel a bisa.
El a agrega cu durante e reunion di dia 7 di Juli a bin tres punto di agenda pero realidad ta cu a trata un punto so, y esey tabata “caba cu Solangel politicamente”. E reunion aki, segun e dama tabata den e mesun modus operandi cu señora Lopez-Tromp a bisa cu nan a haci cune. Pues, na October aña pasa el a bisa cu Minister Andin Bikker a sali papia malo di dje y cu despues Lider di Gobierno, señora Evelyn Wever-Croes no a scucha su banda di medaya y a trece un reunion pa bahe.
“Lamentablemente, señora Lopez-Tromp a uza e mesun modus operandi. El a permiti un hende sali den prensa y difama ami como un candidato riba su lista, y despues a traha un reunion unda su unico meta tabata ataca ami, personalmente”, Solangel a remarca.
Solangel a sigui splica cu den e reunion aki tabata tin 16 persona contra dje. Hendenan cu ta bisa cu ta miembro di e Partido pero cu nunca el a yega di wak prome.
El a señala cu si di berdad gobierno a haci esey cu Lopez-Tromp, riba locual Solangel tin hopi duda awo, nan a hacie cu un persona cu 23 aña di experiencia, pero el a bin hacie cu un persona cu dos luna di experiencia. “Mi ta kere cu akinan nos por haya un bon imagen di ken, enberdad, Marisol Lopez Tromp ta!” Solangel a bisa y a expresa cu señora Lopez-Tromp si sa kico ta un complot, pasobra esey tabata locual a sosode den reunion aki.
