Helicopter a bula distancia basta leu pa evacua un pasahero di crusero

E pasahero a haya ataca di curason

ORANJESTAD (AAN): Tabata Diamars anochi cu Centro Operacional Maritimo (Centro MOC) di Wardacosta di Caribe Hulandes a ricibi un notificacion for di un barco crucero cu tabata pidi pa un evacuacion medico.

   Ta trata di un hende homber turista cu nacionalidad Mericano di 79 aña di edad kende a sufri di un atake di curason. E pasahero tabata mester di asistencia medico mas lihe posibel.

    Centro Operacional Maritimo di Wardacosta a tuma contacto cu CITRO Medico pa ricibi conseho. Despues di a consulta cu e medico, a determina cu e persona tabata rekeri di asistencia medico urgentemente. 

   E barco crucero tabata nabegando relativamente leu for di Aruba y ta pa e motibo ey, a dicidi di pidi tripulacion di helicopter pa asisti cu e caso. Despues di e preparacion nan necesario, e Helicopter a lanta vuelo pa 11:35 pm di Corsou y a baha na Aruba riba Diaranson marduga pa 12:08 am.  Na Aruba a haci preparacion, yena jetfuel den Helicopter, y pa 12:50 am e Helicopter a subi pa un vuelo largo.  E crusero e momento ey tabata West-Noordwest for di Aruba, y e Helicopter a bula den e areanan di maltempo cu tabatin Diaranson marduga riba Lama Caribe.  Nan a yega e barco te banda di 1:50 am, pues bulando como 1 ora.

   Aki e crusero a cuminza nabega na cierto velocidad den direccion di biento, pa alinea cu e mesun velocidad di Helicopter.

   Despues di 15 minuut, pa 2:05 am, e Helicopter tabatin e pashent abordo, y tambe e medico di e barco tambe.  E ora ey nan a cuminza bula bek direccion Aruba, den tur e area di maltempo.   Bon mes tur cos a bay bon, y e Helicopter a ateriza na Aeropuerto di Aruba pa 3:26 am.  E vuelo a dura mas, debi cu e Helicopter mester a desvia varios biaha pa nubianan diki cu tabatin riba lama, manera por mira riba e mapa.  E calculo ta cu e crusero tabata 280 km West-Noordwest di Aruba, den un area como 185 km panort di departamento di La Guajira na Colombia.

   Pues e helicopter a bula como 280 km pa bay, y 280 km pa regresa, esta 560 km.  E Helicopter aki ta diseña pa bula distancia maximo di 1.061 km leu.

   Na momento cu el a yega 3:30 am na Aeropuerto Internacional di Aruba, personal di ambulance a tuma e pashent over y a sali den direccion di Hospital HOH pa e por ricibi e tratamento medico necesario. 

   E tipo di operacion nan aki ta subraya e importancia di un bon coordinacion y comunicacion cu tur instancia nan concerni na momento cu ta trata bida di hende. Cada seconde ta conta. 

   Wardacosta di Caribe Hulandes ke expresa palabra nan di gradicimento na aeropuerto internacional di Aruba, gobierno di Aruba y tambe tur instancia nan concerni pa e bon cooperacion, comunicacion, flexibilidad y profesionalismo durante di e tipo di caso nan aki.  Hunto ta percura pa bienestar y siguridad di Aruba. 

   DIARIO ta gradici tambe e personal di e Helicopter tipo Leonardo AW-139 cu a haci e vuelo di rescate aki.  E ta un helicopter di dos motor, desaroya pa e fabricante Italiano di helicopter AgustaWestland, cu awor ta parti di Leonardo.  Cu casi 3 ora di buelo, esun aki di Wardacosta di Caribe Hulandes a bula pa yuda un pasahero haya yudansa medico.