Jessica Ras di Formacion Social-SVT:
- Motivacion y union ta fortalesa e grupo
ORANJESTAD (AAN): E 11 hobennan cu actualmente ta forma parti di e Trayecto SVT-21 ta prepara pa un bishita na Corsou, caminda nan lo participa den un programa intensivo cu actividadnan semi militar y intercambio cultural. Jessica Ras di Formacion Social-SVT a comparti e desaroyonan di e trayecto durante un entrevista cu DIARIO.
E trayecto a cuminsa na augustus ultimo y, segun Ras, no ta un caminda facil. Durante e prome simannan, e grupo a reduci te na 11 participante. Algun hoben a sali pa decision di SVT, mientras cu otronan a dicidi di retira pa diferente motibo.
Sinembargo, Ras a indica cu e grupo actual ta firme y motiva. E expectativa ta cu tur 11 hoben lo completa e prome fase na december, pa despues continua cu e segundo fase di e trayecto.
E bishita na Corsou lo ta un experiencia special pa e hobennan. Pa varios di nan, esaki lo ta e prome biaha cu nan lo ta pafo di Aruba. Ademas, nan lo bay cu un barco di Defensa, loke ta agrega un elemento unico na e experiencia.
Na Corsou, un programa intensivo ta warda nan, cu entre otro ehercicionan semi militar y dos actividad hunto cu SVT Corsou. Un di e actividadnan ta un programa di landamento di algun. Na final, e participantenan lo ricibi un medaya como reconocemento di nan participacion y como recuerdo di e experiencia.
Ademas, e hobennan lo bishita diferente luga pa conoce mas di e cultura di Corsou.
Durante nan estadia, e grupo lo keda na un base militar. Segun Ras, esaki ta un oportunidad balioso, particularmente pa e hobennan cu tin interes den sigui un formacion militar na Corsou. Nan lo por conoce mas di e ambiente militar y ricibi informacion tocante e posibilidadnan di formacion.
Ras a menciona cu desde augustus ya tin hobennan di Arumil cu ta siguiendo un formacion militar na Corsou.
Fuera di e preparacion pa e biahe, Ras a destaca e bon relacion entre e participantenan. Segun e, e hobennan ta traha bon hunto, ta motiva otro y ta mustra un fuerte sentido di compañerismo.
Como ehempel, el a comparti cu seis hoben a tuma e decision di bautisa. Henter e grupo tabata presente pa sostene nan den e momento ey, un gesto cu ta refleha e union cu a crece entre e participantenan.
Cu e prome fase acercando su final, e reto ta pa mantene e compromiso y logra cu tur 11 hoben sigui dilanti. E motivacion y e sosten cu nan ta brinda otro ta forma un base importante pa enfrenta e proximo fase, mientras cu e biahe na Corsou lo brinda nan oportunidad pa amplia nan conocemento, descubri posibilidadnan nobo y sigui crece como grupo. Motivacion y union ta fortalesa e grupo.
