ORANJESTAD (AAN): Gobierno di Venezuela a confirma, cu nan tambe lo participa hunto cu 44 otro pais den e simulacro internacional di tsunami yama Carib Wave 2023, cu lo ta Diahuebs 23 di Maart 2023.
Aki lo bay tene accion di prevencionnan pa cu un tsunami provoca pa e erupcion y colapso di e sero di Mount Pelée na Martinque.
Pa Venezuela, e accion di simulacro lo wordo lidera pa funcionarionan di Fundacion Venezolano di Sismologia (Funvisis) y e Sistema Nacional de Gestion de Riesgo (SNGR).
E simulacro lo bay yuda Venezuela den prevencion ora di un tsunami, esta con pa identifica nan, disminui nan exposicion pa cu e eventonan aki, y esey ta e meta principal di e simulacro aki.
Segun proyeccion di computer, si un tsunami wordo genera debi na e volcan na Martinique, e lo manda un ola cu lo dal na e parti pariba di Venezuela, afectando principalmente estadonan Sucre y Nueva Esparta.
Pesey mes, den e simulacro aki, e personal y tur equipo di rescate y salbamento di e dos estadonan aki lo bay ta organizando e areanan di evacuacion, y lo implementa plannan pa e actividad aki bay na un forma hopi eficiente.
