Dr. van Trigt y specialista Dr. Randall Leon a mustra cu:
ORANJESTAD (AAN) Docter van Juaquin van Trigt, Presidente di Asociacion di Docternan di Cas Aruba (HAVA), a hiba palabra den e conferencia di prensa, prome cu e firmamento entre e HAVA-ASHA, a tuma lugar, Diabierna merdia.
Van Trigt a cuminza pa bisa cu e dia aki e ta consider’e hopi importante pa e docternan di cas y e specialistanan, unda cu nan a firma un acuerdo, den cual ta bay delinea con nan ta bay traha hunto, e siguiente añanan pa purba di mehora y mantene e calidad di cuido na Aruba.
“Mi mester bisa cu tin cierto añanan caba unda nos ta ripara cu tin mehoracion, cu e ta posible, y cu semper nan por brinda un miho cuido. Nos a splica otro cu nos ta bay sinta hunto y wak unda e puntonan dificil ta, nos ta bay colabora mas cu otro, nos ta bay purba di target unda e problema, den e cadena di cuido, ta sinta, y nos ta bay busca solucion pa yega na un cuido cu ta mas accesible y nos ta spera tambe mas eficiencia y menos costo pa Aruba.
Esey eigenlijk ta e plan cu nos a firma, pa bay traha riba un par di protocol, unda nos ta splica ki ora un pashent ta wordo verwijst pa un specialista, y ki ora un specialista tambe ta dicidi cu e pashent a wordo yuda y cu e por bay bek su docter di cas. E docter di cas ta keda e punto primordial unda e pashent ta busca su ayudo prome, y enberdad na unda e gasto di cuido tambe ta mas eficiente y menos costoso”, docter van Trigt a indica.
Van Trigt a agrega cu asina tambe nan ta purba baha e lista di spera di segundo liña na Hospital, door di mantene e cuido innecesario pafo di segundo liña y mas den prome liña, unda docternan di cas ta bay hunga un rol hopi importante.
“Cu esey, mi ta desea tur hende incluyendo ASHA, AZV, partnernan, Hospital y ImSan hopi exito den e proximo aña”, docter van Trigt a conclui.
Seguidamente, Docter Randall Leon a tuma e palabra y a expresa cu semper e specialistanan tin bon relacion cu docternan di cas, pero e diferencia ta cu awo door di “Zorgakkoord” nan ta bay enfoca mas con pa haci e sistema di cuido na Aruba, mas eficiente, y percura pa e costonan no keda subi y subi, ya cu nos poblacion ta birando mas di edad mas grandi y e costonan di cuido ta bay subi. “Nos ta tuma esaki hopi na serio pa nos traha hunto pa zorg pa e no bay for di man. Contento pa firma e acuerdo awe”, el a bisa, finalmente.
