Dentro di e surplus di 1.9% di presupuesto supletorio 6.7 miyon ta destina pa Parlamento

Presidente mr.Edgard Vrolijk a duna di conoce:

• Esaki ta pa renovacion total edificio Parlamento 

ORANJESTAD (AAN) Presidente di Parlamento, Edgard Vrolijk, den entrevista cu DIARIO a menciona cu Parlamento a trata dos presupuesto e siman aki. Esun prome ta e Presupuesto Supletorio 2023 cu a keda cla dialuna.

Tabata tin un surplus di 1.9%, kiermen mas di loke a premira cu tabata 1%. Edgard Vrolijk a indica cu esey a haci cu a resta placa cu por a paga extra na e debe, manera tabata e deal.

“Na momento cu ta pasa 1% di surplus, mitad ta pa paga debe, mitad ta bay pa inversion y den esey e placa di inversion a aumenta. Na luga di 20 miyon a haya 25 miyon”, mr.Vrolijk a bisa.

Den esey, el a agrega, tabata tin 6.7 miyon destina pa Parlamento y awo nan tin cu bay termina e proceso di e parti dilanti di Parlamento, manera e verfmento, y pa bay destaho publico, cu presidente di Parlamento ta kere cu lo ta rond di April 2024, pa asina rond di Augustus/September Parlamento conoce su renovacion.

“Esey no ta kita afo cu ya pa dialuna of diamars (otro siman) ta cuminza cu e prome fase manera kitamento di bentana di e otro banda, cu pa hopi aña ta ineficiente, y lo wordo cambia. Tambe pa Maart ta bay dal full un make over, un verf nobo completo, un entrada nobo, y asina Parlamento lo cuminza haya e forma di un ‘Hoge college van staat’ pa locual ta un edificio”, Presidente di Parlamento Edgard Vrolijk a señala.

E prome trabaonan lo cuminza den recess pero e trabaonan di construccion grandi lo tuma henter e aña, mr. Vrolijk a agrega. E renovacion di edificio di Parlamento lo bay den diferente fase, y e culminacion ta e sala den su totalidad cu tambe lo haya un cambio completo, mas moderno y nechi y asina ey Parlamento por sirbi su comunidad.

“E no ta facil. Ta un lucha grandi cu mester a hiba cu gobierno, cu tur instancia, pa por a keda cla, pa por a bay cana un caminda largo pasobra mester a entrega e dossier na DC pa bo cay den aprobacion”, e Parlamentario a subraya, acentuando cu Parlamento a haci su trabao pasobra e tambe mester a carga su responsabilidad, y marcando e diferencia entre Gobierno y Parlamento.