Director di AZV, Ir. Edwin Jacobs:
ORANJESTAD (AAN) Diabierna 15 di December aki, a tuma lugar e firmamento di un acuerdo di colaboracion entre HAVA y ASHA (Asociacion di Specialista di Aruba trahando na Hospital). Esaki a sosode den conferencia di prensa. A pidi disculpa den nomber di Minister di Salud cu tabata bezig den Parlamento, tratando Presupuesto 2024.
Tabata presente Ir. Edwin Jacobs, director AZV, docter van Trigt di HAVA, Director di ImSan docter Joel Rajnherc, y Docter Leon.
Director di AZV, a menciona cu ta trata aki di dos acontecimento sumamente importante, y el a cuminza pa bisa cu pa Salud Publico aña 2023 tabata un aña sumamente exitoso, y sin duda un acuerdo exitoso ta esun di dia 26 di Juli yama “Zorgakkoord”, unda cu e entidadnan den cuido a cera un acuerdo unda, en base na e acuerdo aki, a identifica e areanan di cuido cu lo wordo fortifica den e proximo añanan, ademas saliendo for di e principionan cu a wordo poni den e Landspakket pa loke ta trata eficiencia y eficacia.
Jacobs a menciona dos acontecimento cu a tuma lugar y cu ta deriva directamente di e “Zorgakkoord” menciona, ta pone e base pa cuido pa cu futuro, y asina aki percura pa den futuro tin un sistema di cuido cu ta keda financieramente pagable, pero cu tambe, por cumpli cu e demanda cu ta bay tin di parti di nos comunidad.
Ir. Edwin Jacobs a splica cu e prome acontecimento cu a duna atencion na dje, ta e acuerdo di cooperacion cu a firma entre e Asociacion di Docternan di Cas y Asociacion di Specialistanan trahando na Hospital di Aruba. Jacobs a reitera cu esaki ta bira hopi importante pa e parti di fortificacion di e prome linea pero tambe e bahamento di presion riba e segundo linea di cuido na Aruba, durante e siguiente añanan.
