Hannah Arends corona como Miss Universe Aruba 2025

ORANJESTAD (AAN): Como cu e auditorio di Cas di Cultura no ta apto pa publico sinta den dje,

por lo pronto Cas di Cultura ta haciendo uzo di Ballroom di Paseo Herencia pa eventonan grandi.

   Riba Diadomingo anochi nan tabatin e certamen tan spera di Miss Universe Aruba 2025 organiza door di My Dream Institute Foundation.  E certamen a conta cu 4 candidata fuerte cu a luci inmensamente riba escenario.

   E anochi aki a conta cu Addonsito Croes y Angeline Dirksen como maestro di ceremonia, y ambos a guia e show na un forma perfecto y na agrado di publico.

   E certamen a start cu un baile bunita cu coreografia yamativo, y a sigui despues cu candidatanan presentando nan mes riba escenario den diferente segmento.

   Cu tur cuatro candidata riba escenario teniendo man hunto, a anuncia e nomber di e ganadora, esta Hannah Arends di 28 aña di edad.

   Despues di a pone su sjerp, a toca turno pa Prome Ministro Mike Eman pa corona Hannah.  E lo bay representa Aruba na e certamen di Miss Universe cu lo ta dia 21 di November 2025 na Thailandia.  Publico a grita di alegria, y tabata contento cu e dama inteligente, carismatico, simpel, y extremadamente bunita a keda eligi.