Departamento di Cultura Aruba:
ORANJESTAD (AAN): E periodo di vakantie ta cabando y scol pronto ta bay inicia bek, pero prome cu nos muchanan bolbe na e rutina escolar, Departamento di Cultura Aruba ta invita tur mucha pa inscribi y participa den e Carrousel di Expresion, Talento y Creatividad, un proyecto artistico y multidisciplinario realiza den colaboracion cu Buki di Pret.
Pa ken e Carrousel ta: Pa tur mucha cu tin gana di explora su talento y siña den un ambiente creativo, mientras nan ta conoce y aprecia nos herencia y identidad cultural. Cu e tema central: “Nos Cas ta Bon Traha”, e ta un espacio pa descubri potencial, expresa identidad y construi un futuro briyante. E lo ta dia 15 di augustus 2025, for di 10:00 am te cu 4:00 pm na John F. Kennedy Education Center, y cu presentacion final pa famia y publico di 3:00 pm te 4:00 pm.
Cupo ta limita pa 50 mucha y participacion ta completamente gratis. Inscribi pasa durante ora di oficina na John F. Kennedy Education Center, of yama 582-2185.
Lo tin un maestro pa cada disciplina artistico (baile, teatro, arte visual, canto y musica) cu lo guia e muchanan den diferente tecnica te cu nan presentacion final. Mucha mester bin c’un paña comodo cu por susha, verf riba dje, y un boter di awa. Mayornan tene na cuenta y no laga nos muchanan perde e oportunidad pa forma parti di un experiencia inolvidabel.
