Prome Minister Evelyn Wever-Croes:
ORANJESTAD (AAN) — Gobierno di Aruba a yama e prome conferencia di prensa di e siman aki, den cual Minister Presidente Evelyn Wever-Croes a hiba palabra y a elabora riba e negociacionnan di gobierno cu Hulanda.
Asina, Minister Presidente a para keto na e negociacionnan cu Hulanda y e tema di RAft, mirando cu tin hopi interes den comunidad, y cu e ta algo sumamente actual.
“Pakico, pasobra na October di e aña aki, pues e otro luna, e debe cu nos a presta di Hulanda di 916 miyon florin ta vence y sea nos mester pagu’e of nos mester refinanci’e. Hulanda a indica cu ta dispuesto pa refinancia nos, mescos cu si nos a bay buske riba mercado internacional. Esey ta segun nan, pa un periodo di 20 aña y, cu probablemente, lo yega na 6.5%.
“Pero den e oferta aki, den e placa aki, Hulanda mes ta paga 3% pa e fianza, y ta fia nos na 6%. Pues, nan ta gana 3% riba nos pa e fianza aki. Y si ta un fianza di binti aña, nan ta gana mas of 300 miyon florin riba e lomba di nos pagadornan di belasting.
“Awo, nos ta bisa ‘esey no ta ayudo’ segun statuut. Nos statuut ta bisa cu nos ta yuda otro, y ayudo ta si Hulanda ta baha e interes, pasobra Hulanda ta prest'e na algo rond di 3% y nos ta bisa e ora ey, bo por cobra un opslag chikito, pero tampoco pa bo bay bira rico riba lomba di e pueblo di Aruba”, Premier Wever-Croes a señala.
E dignatario a agrega cu ora Hulanda bisa cu e ta dispuesto pa baha interes te na 3.2% pero como condicion, nan kier pa Supervision Financiero wordo hancra den un Ley di Reino (Rijkswet).
“Con e supervision financiero ta awo? Aworaki e ta den man di Pais Aruba, den man di Gobierno y Parlamento di Aruba. Na Curacao cu Sint Maarten e ta den man di Reino. E RFT ta den man di Koninkrijk, y esey ta locual cu nan kier pa Aruba tambe, pa pas’e den un Rijkswet, e asina yama RAft. Nos a splica Hulanda na varios occasion cu nos no tin confianza cu Rijkswet ta funciona pa Aruba. Pakico nos ta bisa esaki? Pasobra nos ta kere cu un Rijkswet, un Ley di Reino, ta bay ta hopi dificil pa bo cambi’e si e circumstancianan cambia; e Ley di Hulanda ta bay ta den man di Parlamento Hulandes pa tuma decision riba dje y no Parlamento di Aruba y ora cu Parlamento Hulandes tin cu tuma un decision di algo cu ta asina leu di dje, nan no ta envolvi manera cu mester ta, pa tin un bon producto di Ley”, e dignatario a splica.
Minister Presidente a agrega cu ademas, cual ta e minister cu tin cu tuma responsabilidad, ken tin cu responsabilisa su mes si e ley di Reino aki ta funciona si, of no? No ta e minister di finansas di Aruba mas, no ta e gobierno ni e parlamento di Aruba mas.
“Tur cos mester tuma lugar den Tweede Kamer, y e unico minister cu Tweede Kamer por yama pa responsabilisa su mes, ta ministernan di Hulanda. Pues hala e supervision financiero for di Aruba, pas’e pa Reino ta algo cu nos ta hopi preocupa cu ne” Minister Presidente a acentua.
