Haitianonan extremadamente contento pa mira militarnan Hulandes

ORANJESTAD (AAN): Manera cu DIARIO a raporta caba, Defensa Hulandes a manda nan barco Zr.Ms. Holland cu hopi material di yudanza pa Haiti cu a wordo devasta pa un teremoto riba Diasabra siman pasa.

   Fuera di tur esey, e barco tin material pa habri un ‘Hospital temporal’ tambe pa duna yudanza, danki na algun medico specialista cu nan a bay cune pa Haiti.

   Riba Dialuna, e barco Zr.Ms. Holland a ricibi e instruccion di e Instancianan di Yudanza pa Haiti, pa haci un inspeccion aereo.  Nan a haci esey pa busca un lugar adecuado pa lanta e ‘Hospital temporal’ aki.

   E helicopter NH90 a haci e inspeccion aki hunto cu Mariniernan, y finalmente a logra haya un espacio ideal pa haci esey na e bario di Aquin.

   E piloto di NH90, esta Luitenant ter Zee 2ndo clase Chris, a bisa: “Nos presencia a haci e poblacion bira hopi emocional, y esey tabata visible claramente for di halto mes.”

   Haitianonan ta contento di mira yegada di yudanza!  Nan ta reclamando cu ya dos siman a pasa y casi nan no ta mirando nada di hende cu ta dunando nan un man.

   E potretnan aki pa cortesia di Defensa Hulandes, ta mustra loke a pasa Dialuna na Aquin, Haiti.   Aquin ta keda como 115 km west di Port-au-Prince, den e area hopi devasta pa e teremoto.