ORANJESTAD (AAN) – Atelier’ 89, Punto di Beyas Arte Aruba, a reuni cu Formador Evelyn Wever-Croes, den e cuadro di formacion di gobierno nobo,
y den conferencia di prensa despues di e reunion, señora Maria Silva a duna su comentario tocante e encuentro aki.
El a gradici Formador pa a ricibi nan y scucha tur e metanan cu Atelier’89, Punto di Beyas Arte Aruba tin pa trece dilanti. El a menciona cu hunto cune a reuni cu Formador, e director Elvis Lopez, Lupita Bernabela y Christian Arends cu ta parti di e board formador di Atelier’89.
Maria Silva a menciona cu nan tabata tin un reunion sumamente agradable, y Atelier’89 a trece dilanti tur e preocupacionnan cu nan a bin ta lucha cune durante tur e 15 añanan cu nan tin funda, y tur e metanan cu nan tin nan dilanti y cu e aña si, nan kier logra.
Silva ta sinti cu Formador y su team a tende di nan, kico nan kier logra, kico nan kier wak, y e ta haya cu e reunion aki tabata super informativo.
Como parti di e preocupacionnan cu nan tin, Maria Silva a menciona cu actualmente tin hopi organizacion cu ta profila manera Atelier’89. Ademas cu semper nan tin e retonan chikito con pa haya fondo. Tambe nan mester haya sosten di gobierno tocante con nan por haci nan relacionnan publico, pasobra hopi biaha nan ta crea evento, ta tuma den nan man mes pa bin cu hopi tayer di trabao, pero si no tin e sosten pa hende sa cu nan tey, cu Atelier’89 ta existi, e actividadnan no ta hopi exitoso.
Otro aspecto cu nan a menciona cu Formador ta cu Atelier’89 kier wak arte den educacion, pasobra nan pensamento ta cu ora e muchanan bay scol, arte mester ta parti di nan curriculum tambe y pa esey, mester e sosten di gobierno.
Aworaki, Atelier’89 ta traha non profile. Kiermen pa ningun placa. Pero nan meta ta por duna tayernan di trabao, mantene Atelier’89 bibo, unda e hendenan por bay pa haya apoyo, informacion, y estudio di arte; ademas, e ta un centro comunitario en general.
Pesey e board ta pone hunto diferente tayer, curriculums y nan ta busca nan propio fondonan cu, mayoria di biaha, ta bin di afo.
Logicamente, Maria Silva a mustra cu nan ta desea di haya subsidio di gobierno, door cu Atelier’89, Punto di Beyas Arte Aruba, ta e unico centro cu tin un base asina grandi y cu ta traha pa hopi aña na su mesun oferta. “Claro cu nos kier tambe support di gobierno, y no solamente financiero pero tambe pa trece dilanti e palabra di Atelier”, Maria Silva a indica.
