ORANJESTAD (AAN): Durante un conferencia di prensa diahuebs mainta, Directora di Departamento di Impuesto (DIMP), Luenne Gomez-Pieters, a referi na e cambionan mas importante cu pronto ta bay drenta na vigor pa loke ta e Plan di Impuesto 2023.
Ademas di e cambio den e tarifa di BBO, cual lo conoce un aumento di 1%, el a bisa cu e otro cambio cu ta na caminda ta
un pakete di compensacion pa mitiga e efectonan di inflacion door di introduccion di ahuste di tarifa di BBO, a bisa.
No por acapara tur e efectonan di inflacion mirando cu tambe tin di haber cu e inflacion cu ta wordo importa for di exterior cu ta resulta den un incremento den prijsnan di producto y/of servicio.
E directora di DIMP a sigui bisa cu pa loke ta e pakete di compensacion, ora cu tin un cambio di impuesto, semper tin un efecto riba inflacion. E ahuste riba tarifa di BBO cu 1% ta trece un inflacion di 1.4% di efecto riba e prijsnan.
Pa cu esaki lo mester tin un pakete di compensacion cu ta bay man den man pa asina por alivia e peso extra di impuesto cu lo tin efecto riba cada ciudadano of contribuyente, a remarca.
Gomez-Pieters a splica cu e compensacion pa e contribuyentenan individual ta encera cu ta baha e tarifa den e prome dos categorianan di impuesto riba entrada cu 2% (WAK GRAFICO ADHUNTO).
Riba e website di DIMP tin e grafico aki y tambe un calculator unda por mira e diferencia entre e peso di impuesto cu e ta pagando den 2022 y con e lo bira den 2023, segun e ahustenan den ley.
Ta aumenta tambe e suma liber di impuesto pa tur contribuyente individual y empresa chikito (eenmanszaak) di 28.861 florin pa 30.000 florin pa aña.
El a bisa cu ta interesante pa menciona cu 36.161 contribuyente (60% di e forsa laboral) lo no tin cu paga Inkomstenbelasting/Loonbelasting mirando cu nan tin un entrada bao di 30 mil florin pa aña cu ta e suma liber di impuesto.
Den cada categoria a pone e montante di contribuyentenan cu ta cay den cada categoria di impuesto. Den categoria I tin 17.162, categoria II: 4.516, categoria III: 1.998, categoria IV: 668. Asina por mira con e reparticion ta den cada categoria y tambe den e entrada di cada contribuyente, Luenne Gomez-Pieters a duna di conoce.
