Reto despues di Omicron, Guera di Ukraine y Inflacion
- Aseguro mester cubri resultado di loke mundo no a spera
- Pakete di responsabilidad financiero di aseguro lo subi
ORANJESTAD (AAN)- E necesidad di prestamo a crea un ala cu te awe ta crece den e sector mundial financiero, cu ta percura pa hende expone su mes na un peliger grandi.
Kico lo pasa si hende no por cubri su gastonan mas ainda si ripara con e palabra “credito”a bira uno di e negoshinan mas grandi di mundo? Un pregunta pa cual expertonan ta busca un contesta ya cu cambio di clima lo subi e prijs, cu hende mester pa e existi.
Ora hende pone su mes na riesgo, e mester di algo cu ta cubri e riesgo. Esaki a bira nacemento di e palabra “aseguro”cu hende ta paga pa evita cu hende ta den problema ora necesidad pa haci pago presenta.
Den e pakete di cubri necesidadnan directo di hende, ta topa cu aseguro medico. Un persona no ta depende di e placa cu e tin personalmente ora e wordo confronta cu enfermedad leve of grave of hasta resultado di un accidente.
Ora papia di accidente, ta topa cu situacionnan cu den tempo moderno, sigur mester tene na consideracion.
Hende ta subi avion. Hende ta participa den trafico. Hende ta subi lama. Hende ta yena su bida mas y mas cu situacionnan peligroso cu finalmente aseguro mester cubri.
Candela ta un problema serio. Placa pa muchanan por sigui nan estudio. Placa pa traha cas, pa cumpra auto, pa bay cu vacacion, pa cumpra paña y keda den linea di modernismo.
Hende mester di placa pa habri empresa cu tambe ta nace a base di placa cu mester paga despues.
Ningun hende, negoshi, profesional, instancia no por funciona sin cobra y mester percura pues pa tin aseguro pa por cobra tur placa di prestamo y credito hasta si e hende of instancia stop di existi.
Aseguro a bira un negoshi creciente, cu a wordo enfrenta cu problemanan serio ora Omicron a paralisa mundo y e cadena di entrada cu mester sostene entrada di companianan di seguro, a kibra.
Omicron a manda hende hospital. Con a paga pa e debenan di enfermedad, di entiero, di tur loke esaki a encera?
Omicron a stroba produccion y transportacion di productonan cu resultado di perdida. Con e perdida a wordo cubri pa aseguro special?
Guera di Ukraine a rementa. Otro reto pa mundo di aseguro, cu mester a atende tambe cu e riesgo di inflacion.
E cantidad di hende cu a keda cu problema despues di Omicron cu ainda ta presente, ta uni na e crecemento diario di poblacion mundial pasobra edad di hende ta subi.
Aseguronan cu antes por a pensa cu na cierto edad un persona cu un aseguro medico lo no ta riba nan lista mas, awor ta mira con edad ta subi y sigui subi.
E ta e berdad amargo cu hende no ta realisa.
Cu cual suma total, Omicron a aumenta e gastonan medico pa resto di bida di un persona cu un aseguro?
Mundo ta regla su problemanan pa medio di aseguro, cu hende ta perde for di bista. Pero aseguro mester cubri e daño cu hende a sufri pa mal construccion di un edificio.
Den tempo moderno hende mester asegura nan mes completamente contra tur tipo di riesgo cu antes no tabata conduci na casonan dilanti Hues.
Companianan di aseguro mes mester asegura nan mes. Mundialmente mas compania di aseguro ta busca forma pa coopera y ta uni cu otro a base di specialismo.
E reto di futuro di companianan di aseguro no ta facil despues di shocks cu nan a conoce. Pero finalmente mester paga!
E pregunta final ta e pregunta clave. Kico hende mester pa e sigui biba? Cuanto placa mas e mester pa asegura su mes contra tur riesgo?
Cambio di clima lo causa mas enfermedad. Cambio di clima lo exigi mas gasto riba tur tereno di cuminda te transportacion.
Cuanto placa lo mester paga pa subi un avion of pa un barco trece fruta? Con aseguro ta cubri mas candela cu por spera, mas destruccion di edificionan?
Gasto di companianan di aseguro lo sigui subi mientras clima ta cambia.
Gastonan nobo lo presenta cu aseguronan nobo pa enfrenta exigencia nobo cu cual hende lo mester biba.
Un epoca hopi dificil ta spera hende cu te awe no kier realisa con cada hende mester aporta pa enfrenta e futuro nobo, den cual hasta aseguro mester busca e formula pa keda seguridad enfrente inseguridad.
