Guizza Maria Steenvoorde lo regala candidatanan di Miss Teen Universe International un obra di arte unico

Un pida di Aruba rumbo na Nicaragua

ORANJESTAD (AAN): Den un celebracion briyante di union y creatividad, e conexion entre Aruba y mundo lo florece pa medio di e poder transformador di arte. Alejandra Vallejo, un artista di Driftwood di renombre, a crea un testimonio bibo guia pa e spirito luminoso di Guizza Maria Steenvoorde, Teen Universe International 2025. Su obra maestra colectivo lo conta un historia di residencia, speransa y e hilo inkibrabel cu ta uni humanidad.

Alejandra hunto cu famia di Guizza Maria, a reuni “driftwood” (palo di lama), fragmentonan di naturalesa cu a biaha a traves di oceanonan pa yega na costa di Aruba, y a converti nan den obra di arte cu un toke di Aruba. Un pisca chikito cu, maske su tamaño, semper ta yega na su destino sin reserva ni lamento.

“E forsa di arte, manera e coriente cu ta trece palo di lama pa riba nos playanan, ta trascende frontera y ta uni curasonan. Ta un testimonio di e idea cu for di lugarnan leu nos por haya un base comun, y for di comiensonan remoto nos por construi algo extraordinario. Pa medio di e iniciativa artistico aki, hobennan ta corda cu nan soñonan no tin limite, nan spirito ta resiliente y nan creatividad colectivo ta un faro di speransa pa generacionnan cu ta bin.” Guizza Maria ta expresa.

Ora e palo di lama biaha for di nos man pa curason di cada persona cu ta participa den e gran eleccion di Miss Teen Universe 2026, e lo hiba cu ne e alma di Aruba. E coleccion extraordinario aki no solamente lo ta un obra maestra visual, sino tambe un simbolo di conexion.

Guizza Maria Steenvoorde, hibando e esencia di su isla, lo presenta e piezanan unico aki como regalonan di curason na e candidatanan for di mas di 60 pais rond mundo, durante e di 15 certamen di Miss Teen Universe International na Nicaragua. Pa medio di e gesto aki, e ta extende e abrazo di Aruba na mundo, poniendo e enfasis: “ Cu mescos cu e fragmento mas chikito di naturalesa, forma pa adversidad, por bira un vehiculo di beyeza y inspiracion, como tambe e curashi di cada persona cu ta participa.

Guizza Maria Steenvoorde ta gradici Tito Bolivar, gerente di fundacion Artisa, pa su inmenso colaboracion y cu a haci esaki posibel. El a habri e portanan di Artisa pa por a traha y su donacion pa por yega na e obranan aki. Y Alejandra Vallejo pa su guia den algo asina bunita.

“Pronto lo mi entrega mi corona, den e diez dianan cu mi ta na Nicaragua, den cada paso cu mi ta tuma, mi ta haci esaki cu Aruba den mi curason y den tur loke cu mi ta haci. Ta un oportunidad valioso,  pa mundo por sinti nos candor y nos calor. Aruba lo keda graba den mente y curazon.”