Minister di Enseñansa, Gerlien Croes:
ORANJESTAD (AAN): Minister di Enseñansa, Gerlien Croes den un entrevista recien cu DIARIO a elabora riba situacion di EPI enfatisando cu ta tempo pa cambionan tuma luga. El a remarca cu ta casi 20 aña pasa cu e cambio a tuma luga pa crea e scol aki y cierto momento e capacidad pa carga e scol a bira mucho chikito. Diferente unit a ser crea y ta dificil pa carga tanto alumno. Sinembargo, ta fastioso, segun el a menciona, cu durante añanan ningun cambio a ser haci pa mehora e situacion.
Apesar di e cosnan negativo, e Minister a enfatisa cu tambe tawatin cosnan positivo cu a tuma luga na e scol, entre otro alineacion di e sistema di EPI na un sistema escolar mas cercano di sistema Hulandes y e cooperacionnan cu tin cu ROC Mondriaan na Hulanda.
Sinembargo e minister a enfatisa, e structura di e scol mester a ser fortifica prome cu a bay den e stapnan grandi aki. Mester haci un transicion debido, prepara docentenan y studiantenan pa e cambionan. Segun e minister, parcialmente den e proceso di e cambionan aki den e ultimo añanan di EPI, no ta tur cos a bay manera mester ta.
Minister Croes a remarca cu apesar cu e parti educacional ta positivo, ainda tin espacio pa inverti den dje. Sinembargo, e structura di funcionamento di e instituto aki, ainda ta hopi preocupante. Y pa haci cambio, mester tin un investigacion di e situacion pa sa unda mester haci e cambionan.
“Directie Inspectie ta haciendo e investigacion di e situacion y a base di esey, mi por tuma un decision tambe. Ta hopi importante cu ora tuma un decision como minister, pa tin algo pa hustifica e motibo pa kico a tuma e decision. Mester tin indicacion cu ta mustra cu e situacion no por continua manera cu e ta”, Minister Croes a duna di conoce.
El a agrega, cu mientras ta wardando riba e rapport, el a informa EPI cu tanten cu nan no finalisa e edificio aki, nan lo no haya otro edificio tampoco. Esaki, segun e minister, ta un acuerdo cu el a haci cu EPI y nan lo tin cu cumpli cu lo necesario pa por sigui.
