Nacionnan Uni a faya den proteccion di su motibo di existencia --- *Tension mundial di guera ta afecta hende na tur parti di mundo --- *Cadena di crisis ta crea efecto cu ta mishi cu bienestar personal
ORANJESTAD(AAN)—Pakico mundo a introduci Nacionnan Uni? Un pregunta cu ta ocupa mas y mas hende, mientras e guera na Ukraine ta continua y na un forma of otro ta afecta bida di tur hende.
Den otro articulo DIARIO ta splica e resultadonan cu e tin riba tereno material pa hende na tur parti di mundo, pero informantenan experto ta adverti pa situacionnan mas serio cu e condicion di guera mundial ta presenta.
DIARIO den e fin di siman largo a trata di haya mas contesta posibel riba e pregunta, kico e situacion di guera ta haci cu hende na tur parti di mundo.
Un contesta cu ta wordo duna cu mas frecuencia ta relaciona cu e cansancio di hende cu for di principio di 2020 a bandona loke e tabata considera normal.
“Un tipo di cansancio,” ta loke ta bini dilanti den mayoria di contesta cu ta mustra cu henter mundo ta den gara di decision di un solo homber, cu mundo aparentemente no por contesta.
Por lo general e situacion di guera na Ukraine y e forma cu Rusia por abusa di e pais, ta manda un mensahe sumamente preocupante pa gran cantidad di persona cu a duna contesta riba e pregunta kico ta e pensamento personal di loke ta pasa.
E impresion cu un ladron ta liber pa drenta cas di hende y mata tur habitante, ta loke tas bini mas dilanti y hasta ta papia di peligernan cu hopi bez hende ta lubida.
E peliger cu cualkier pais ta core di wordo ataca y destrui dor di cualkier pais cu kier amplia su teritorio, ta loke mas ta bini dilanti.
Cu e tabata un realidad semper, ta algo cu no por pone un banda. Varios pais na mundo a bira victima di expansionismo den nan region sigur paisnan menos conoci na mundo.
Sinembargo, aunke Vladimir Putin a mustra cu ta tuma poder na Crimea na 2014, mundo no a prepara su mes pa loke ta pasa na Ukraine.
Kico ta pasa awe? Arma ta wordo manda na cantidad pa Ukraine cu no por defende su mes contra Rusia pasobra tin ley.
Segun mas y mas persona, Nacionnan Uni ta un fayo grandi. Mundo no a logra nada cu creacion di Nacionnan Uni cu awe ta permiti e situacion na Rusia, cu ta destrui hende sin piedad solamente pa amplia su teritorio.
Henter mundo ta wordo afecta pa e situacion di guera, cu ta kita pan for di boca di hende rond mundo y afecta e paz personal di hende cu ainda mester biba cu e peliger di Covd-19 y tur e resultadonan cu esaki tabata tin.
E cadena di crisis tras di crisis, cu tur instancia oficial awor ta admiti, tin resultado serio pa trankilidad personal di hende cu tanto na forma material como no material ta wordo afecta.
Na varios pais na mundo por nota cu hende no kier atende ni cu peligro di Covid-19 mas. Cansancio ta domina mientras problemanan ta aumenta, loke pa expertonan ta motibo pa preocupacion.
E imagennan di hende cu ta muri sin motibo, di abuso y crueldad tin un impacto sigur riba hobennan cu ta puntra nan mes, si Nacionnan Uni no por papia riba medio efectivo pa atende cu e menasa di guera contra hende.
Mester introduci un forma pa Nacionnan Uni concretamente por confronta un situacion manera e loke ta pasa na Ukraine, caminda prueba ta wordo duna di un colonialismo moderno, cu ta pio cu e conkista di pasado cu uzo awe di mas arma avansa.
Mayoria ta pensa cu despues di e crisis di Ukraine mester revisa relacionnan cu paisnan por mantene cu Rusia y su aliadonan a menos cu surgi cambio den e tipo di gobernacion cu e pais conoce.
