Mester splica Pueblo salud di e 283 Miyon cu a bira 653 Miyon --- *”Shelter in place” pa Imsan si hospital produci peliger di contagio --- *DIARIO a adverti pa e mundo di magia y e menasa pa salud di Pueblo
ORANJESTAD(AAN)—Na 1972 a construi un hospital nobo pa Aruba. Na 2011, Horacio Oduber Hospital a bira un asunto politico di cinco strea como parti di e proyecto “Bo Aruba”.
Si lesa loke e controlador oficial di placa di Aruba, Algemene Rekenkamer Aruba, a skirbi den su rapport, por mira cu for di momento cu a inicia cu e proyecto renovacion y ampliacion di hospital na 2011, e centro di salud a bira un mundo di magia y un peliger pa salud di Pueblo.
No tabata tin placa. Pero Gobierno Eman a produci placa riba papel. E placa riba papel a origina di fondo di Pueblo, cu no tabata tin placa, pa origina den hospital.
Ora lesa loke Algemene Rekenkamer Aruba ta trece dilanti di henter proyecto, mester conclui cu for di e momento cu a cuminsa cu e renovacion, mester a spera cu bom tras di bom lo a rementa caminda hende ta busca nan salud.
Nos ta bolbe na e punto cu no tabata tin placa pa ampliacion y renovacion di e hospital. No tabata tin placa. Nos ta bolbe ripiti.
No tabata tin e 283 Miyon Florin cu tabata necesario pa construi e Hospital, cu a wordo construi y a wordo tranforma den un debe di 653 Miyon cu Aruba mester a paga finalmente.
Tur e informacion aki ta bini di Algemene Rekenkamer Aruba pues no ta algo cu DIARIO a inventa.
A logra reconstrui y amplia e hospital sin compas di un asina yama “project dossier”?
Facil. E fundacion di Gobierno SOGA a financia e proyecto. Pues e Fundacion di Gobierno cu no tin placa, a financia e proyecto pa cual el a haya tereno den erfpacht di Gobierno, cu a cobra SOGA erfpacht.
SOGA, cu ta di Gobierno, a huur e hospital na Gobierno, cu na su turno a huur e hospital na e Stichting Ziekenhuis Aruba pa asina e circulo cera.
Durante 29 aña Stichting Ziekenhuis Aruba ta paga huur na Gobierno loke ta nifica cu Stichting Ziekenhuis Aruba mester cobra Pueblo di Aruba durante 29 aña sigur tur loke gasto di Hospital ta representa cu no ta solamente e huur cu mester paga Gobierno den un proyecto cu te na momento cu a caba cu e rapport na 2017, tabata costa Gobierno 653 Miyon.
Pa haci e situacion mas serio, den e fantasia total di hospital nobo, a lubida sala di operacion mientras problemanan tecnico te awe tin hospital den cuido intensivo.
Na e momentonan aki henter e base ridiculo pa a yega na e hospital ta den sala di Corte tambe caminda SOGA y SZA ta bringa otro pasobra no ta logra entre otro pasa e cierto espacio di uno pa otro.
E lugar caminda Pueblo mester lucha pa su salud, den un tempo di crisis mundial di salud, e proyecto ta haya su culminacion.
Cualkier mucha chikito cu tuma nota di e forma cu a base di “Bo Aruba” a introduci e proyecto, lo hari.
Awe Aruba ta biba cu e realidad di un hospital, cu ta entrega prueba pa e motibo cu Reino a introduci supervision na Aruba na 2014 pero tambe e dolor di un pueblo cu mester paga pa un hospital cu no ta honra e exigencianan constitucional, legal, cu un hospital mester brinda na pashentnan.
Den e situacion aki, mester bay mara Imsan na Hospital? Mester uni Imsan, cu a duna prueba di su derecho di existencia, den matrimonio cu hospital?
Nos a tuma nota di reaccionnan durante siman pasa. Nos ta di acuerdo cu por ehempel Alvin Molina cu a trece dilanti e necesidad di Pueblo di pariba di brug pa haya asistencia na Imsan.
Na momentonan di yobida cu caretera inunda, trafico pisa, e cuido cu Imsan ta capaz na brinda, ta importante pa scapa bida di hende.
Horacio Oduber Hospital mester di solucion structural y mester cuminsa splica Pueblo pakico su prijs ta asina halto.
Kico ta e gastonan cu ta peso finalmente pa AZV tambe, ta nifica pa Pueblo.
Na e momentonan aki, no mester papia di fusion di Hospital y Imsan. Durante pandemia “Shelter in Place”, isolacion, tabata e mihor remedi contra infeccion.
Si Imsan ta duna bon resultado, ta logico cu no ta trece cambio pero ta bay busca solucion pa HOH.
Papia palabra cla cu Aruba, cu a bira victima di engaño politico cu construccion di hospital.
