Compara cu Maart 2019...
ORANJESTAD (AAN): Un di e bon noticianan cu a sali recien ta cu Aruba a ricibi un total di 95.912 bishitante ‘stayover’ na luna di Maart 2022.
Oficina di Turismo, A.T.A., ta informa cu pa luna di maart nos destinacion a ricibi un total di 95,912 bishitante “stay-over”. Si compara luna di maart 2022 cu maart 2019 - cu tabata e ultimo aña normal di turismo, por mira cu Aruba a recupera 90% di locual a worde ricibi na maart 2019.
E tres mercadonan cu mas a destaca den e cantidad di turista cu a bishita na maart 2022 como tambe den grado di recuperacion ta; Estados Unidos cu 78,358 bishitante cu ta representa un grado di recuperacion di 94% den comparacion cu maart 2019, Hulanda cu 4,229 bishitante cu ta representa un grado di recuperacion di 119% den comparacion cu maart 2019 y Colombia cu 1,932 bishitante cu ta representa un grado di recuperacion di 91% den comparacion cu maart 2019.
Compara cu 2021: E aña 2022 a cuminsa cu un crecemento mas fuerte y stabil cu 2021, maske cu den luna di januari por a wak un caida den recuperacin den comparacion cu e ultimo 8 lunanan di 2021. Sinembargo, e recuperacion den lunanan februari y maart ta sumamente positivo.
Si compara maart 2022 cu maart 2021 por wak cu crecemento di 95.9% den cantidad di bishitantenan “stayover”, for di 48,967 bishitante pa 95,912 bishitante.
Si compara maart 2022 cu maart 2021 por wak un biaha mas cu e 3 mercadonan cu mas a crece den cantidad di bishitante stayover ta Estados Unidos cu un crecemento di 34,979 bishitante “stayover” cu ta representa un crecimento di 80.6%, Hulanda cu un crecemento di 2,649 bishitante “stayover” cu ta representa un crecimento di 167.7% y Colombia cu un crecemento di 725 bishitante “stayover” cu ta representa un crecimento di 60.1%.
Mercadonan: Norte America ta keda e mercado mas fuerte pa Aruba y na maart 2022 un total di 82,436 bishitante Norte Americano a bishita Aruba. Esaki ta 85.9% di e total di e bishitantenan “stayover”. Na maart 2022, Europa a trece 6,269 bishitante pa Aruba, cu ta 6.5% di e total di bishitantenan “stayover”.
Un total di 5,027 bishitante cu ta representa 5.2% di e bishitantenan “stayover” tabata procedente di Latino America; y 2.3% di e total di bishitantenan stayover pa maart 2022- cu ta 2,180 bishitante, a bishita nos isla for di otro partinan di mundo.
Prome cuartal di 2022: E prome 3 lunanan di 2022 Aruba a ricibi un total di 233,666 bishitante “stayover”, cu ta representa un grado di recuperacion di 79% compara cu e mesun lunanan di 2019.
Di acuerdo cu Banco Central e asina yama ‘Tourism Credits’ (anteriormente yama “Tourism Receipts”) pa e prome, di dos y di tres kwartaal di aña 2021 a contribui cu AWG 2,120.10 miyon den nos economia, cu ta 48% mas compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mitar di maart 2020 te cu juli 2020.
