Guardacosta a intercepta riba di 1.300 kilo di droga cerca di Curacao

ORANJESTAD (AAN): Guardacosta di Caribe Hulandes a yuda intercepta un cargamento grandi di droga dilanti costa di Curacao.

   Esaki a socede Diahuebs durante un accion conhunto riba lama, unda e unidadnan di Guardacosta di Caribe Hulandes y e barco Zr.Ms. Holland a traha pa asina intercepta un speedboat tipo Go-Fast cu tabata pasando cu e droganan.

   Detectornan di Guardacosta di Caribe Hulandes tabata esun cu a nota e Go-Fast aki moviendo riba lama, a manda e avion Dash-8 pa bay check e boto.  Cameranan potente di e avion, a nota cu e Go-Fast aki ta moviendo zuid di Curacao cu pakinan grandi di contrabanda abordo.

   Mesora Rescue & Coordination Center (RCC) di Guardacosta a manda e barco Zr.Ms. Holland rumbo pa e Go-Fast aki.  E barco a dicidi na laga nan helicopter abordo, esta e NH-90 lanta vuelo, y a pone un speedboat special FRISC den lama pa yega mas rapido na e Go-Fast.

   No obstante diferente intento y señal duna pa e Go-Fast stop, e capitan a sigui cu e trot manda den bom.  A hasta usa tiro di advertencia, pero ni asina.

   Finalmente e sniper abordo di e NH-90 a dicidi na tira riba e motornan aki, usando municion ‘disabling fire’.  Esaki a yuda y e Go-Fast no por a sigui mas.  Pero aki diripiente a mira cu e speedboat a cuminza sink.

   Pero e speedboat FRISC y Zr.Ms. Holland a yega rapido na e lugar pa asina hisa tur esnan abordo, wanta e Go-Fast pa e no sigui sink, y recoge tur paki di droga for di lama.

   Abordo di e Go-Fast tabatin 12 persona, y en total a haya 45 pakete cu ta consisti di 1.050 kilo di cocaina, y 275 kilo di marihuana.  E sospechosonan aki cu tur pakete, a wordo transferi cu e botonan FRISC y tambe Metal Shark rumbo pa e pier di Guardacosta na Parera (Curacao), unda cu a entrega tur sospechoso y droga na Polis di Curacao.

   Durante e accion aki di intercepta, un di esnan abordo a resulta herida.  E persona aki a ser hiba cu urgencia cu Helicopter pa Hospital na Curacao pa mas tratamento.