* Hospital tin actualmente 51 persona interna
ORANJESTAD (AAN): E fin di siman aki Aruba a registra 4 fayecimento debi na complicacionnan relaciona cu Covid-19. Segun resumen di diadomingo, 135 persona a recupera y un total di 71 caso nobo di COVID-19 a keda registra cual 8 ta turista y 63 ta residente. E cifranan aki ta representa un 'Positivity rate' bao di residentenan di 25%.
Cantidad di casonan activo di COVID-19 pa diadomingo tabata 1084 y cantidad di fayecidonan relaciona cu COVID-19 a aumenta na 119, cu ta trata di 3 residente. Den e ultimo 30 dianan un total di 10 residente a fayece debi na complicacionnan relaciona cu COVID di cual 2 tabatin vacuna y 8 no tabatin ningun vacuna. Condolencia y forsa na famia di e fayecidonan.
Datonan di COVID ta ilustra subida di casonan nobo cu un average semanal di 122 caso pa dia y un average di 'positivity rate' semanal di 30% pa dia.
Hospital tin actualmente 51 persona interna di cual 6 ta den ICU, 44 riba piso general y 1 riba piso di maternidad (hende muher na estado).
Diasabra Hospital tabatin 52 persona interna, cu 7 den ICU, 41 riba piso general, 3 riba piso di maternidad (hende muher na estado) y 1 riba pediatria.
