Grupo Scout Ora Ubao ta haya un rondleiding relaciona cu trabou di Kustwacht na Marinierskazerne Savaneta

ORANJESTAD (AAN): Durante e vakantie grandi, Grupo Scout Ora Ubao ta keda pa brinda e muchanan diferente actividad educativo y recreativo,

cu e meta di brinda su miembronan oportunidad pa sigui descubri, siña y crea recuerdonan inolvidabel.

Diabierna 24 di juli, di 12:30 pa 3:00 di atardi, Grupo Scout Ora Ubao a haya e oportunidad special di bishita Marinierskazerne Savaneta pa un rondleiding relaciona cu trabou di Kustwacht. Miembronan for di bevernan te cu voortrekkers, a participa na e experiencia interesante aki. 

Pa evita cu e muchanan mester cana mucho den solo, nan a wordo transporta cu bus. E biahe den bus tambe tabata parti di e experiencia y e muchanan a disfruta masha hopi di dje. 

Durante e bishita, e participantenan a drenta e radar room, unda nan a haya un splicacion tocante e sistemanan y ekiponan cu ta wordo uza pa monitorea y controla actividad maritimo rond di Aruba. E rondleiding a duna e hobennan un miho comprension di e responsabilidad, disciplina y tecnologia cu ta envolvi den proteccion y siguridad di nos teritorio maritimo. 

Ademas, e grupo a haya un presentacion di diferente ekipo cu e personal ta uza durante nan trabou riba lama. Esaki a brinda e participantenan un bista mas cerca di e preparacion y material cu ta necesario pa por actua den diferente situacion. 

Durante e rondleiding, e muchanan a mira tambe algun boto cu Kustwacht a confisca den operacionnan relaciona cu droga entre aña pasa y e aña aki. Nan a haya informacion tocante e botonan y e trabou cu Kustwacht ta haci pa combati transporte ilegal riba lama. 

Como “cherry riba e bolo”, tur participante a haya oportunidad di disfruta di un paseo den speedboat. E experiencia aki a causa hopi emocion y entusiasmo, y tanto e miembronan mas chikito como e hobennan mas grandi a gosa masha hopi. 

Vakantie ta un momento pa tanto nos muchanan como mayornan y lidernan di Grupo Scout Ora Ubao relaha. Pero tambe e grupo ta di opinion cu mester probecha pa explora, amplia conocemento y disfruta di momentonan especial hunto. 

Grupo Scout Ora Ubao ta expresa su gradicimento na Marinierskazerne Savaneta y Kustwacht pa ricibi e grupo cu mesun entusiasmo cu e muchanan tawatin, y pa e rondleiding educativo. Un danki special ta bay tambe pa tur e mayornan cu a acompaña y yuda durante e actividad. 

Pa no cana mucho den e solo, e muchanan a wordo transporta cu bus, algo cu nan a disfruta masha hopi mes tambe. 

Tambe e muchanan a wak e botonan cu Kustwacht a gara cu droga entre aña pasa cu e aña aki y a haya informacion.