Boluntarionan ta preparando pa Ban Cuida Aruba

Diasabra awor ta dia nacional pa haci nos isla limpi

ORANJESTAD (AAN): Diahuebs atardi, Crisis Management Office (CMO) a reuni cu e representantenan di diferente departamento di Gobierno, instancia y organisacion cu lo ta envolvi den e dia nacional  pa nos ban cuida Aruba. Durante e encuentro, Prome Minister Mike Eman y director di CMO, Rino Hermans, a dirigi palabra na e esnan presente. Nan a splica cu e meta di e iniciativa no ta solamente pa haci Aruba limpi durante un dia, sino pa promove un cambio di mentalidad y crea un cultura nacional di cuido, responsabilidad y amor pa pais.

Prome Minister Eman a gradici tur boluntario cu a pone nan tempo y experiencia disponibel pa sostene e iniciativa. Segun Eman, tene Aruba limpi ta un responsabilidad compartí y un base importante pa preveni diferente problema cu por afecta bienestar y salud di comunidad. Eman a enfatisa cu e iniciativa ta solamente e cuminsamento. E intencion ta pa cuida Aruba bira parti di cultura nacional y fortalece e sentido di solidaridad entre nos ciudadanonan. “Na final, ta nos y e generacionnan cu ta sigui cu lo beneficia di un pais limpi, cu menos crisis y menos sushi,” Prome Minister a expresa.

Acumulacion di sushi ta afecta calidad di bida

Director di CMO, Rino Hermans a indica cu den e ultimo luna Gobierno a intensifica su trabou den diferente bario, hunto cu e teamnan di Departamento di Obra Publico (DOW), Serlimar y Bureau City Inspector. Ademas, regularmente ta organisa actividadnan di limpiesa den bario y recientemente a habri un sitio permanente pa entrega desperdicio, cu ta disponibel shete dia pa siman. Sinembargo, segun Hermans, e cantidad di sushi cu a acumula durante e añanan ta demasiado grandi pa e teamnan existente por elimina nan tur. E situacion ta afecta calidad di bida di habitantenan, imagen di Aruba y tambe salud publico. Den diferente bario y espacio publico tin sushi acumula na canto di caminda, unda cu awa por keda acumula. Esaki ta crea luganan caminda sangura por cria y aumenta riesgonan pa salud.

Limpiesa y responsabilidad social

Hermans a remarca cu, aunke por contrata un compania grandi pa haci Aruba limpi, e iniciativa tin un proposito mas profundo. “Ban Cuida Aruba” ta busca fortalece e sentido di convivencia, solidaridad y responsabilidad social. E intencion ta pa nos ciudadanonan yuda otro, cuida nan bario, parke, cancha deportivo y espacio publico. Por ehempel, un persona cu tin un pickup por yuda un bisiña cu no tin transporte pa hiba su sushi na un di e puntonan asigna. E organisadonan ta spera cu, despues di e actividad, no solamente Aruba lo ta mas limpi, sino cu e deseo pa sirbi pais y prohimo lo keda encendí den curason di comunidad.

Boluntarionan lo dirigi 26 punto

Durante Dia pa Cuida Aruba lo tin varios baki disponibel na 26 sitio rond Aruba. Na cada sitio lo tin por lo menos dos boluntario pa dirigi e personanan cu yega y indica unda y con nan mester separa e diferente sorto di desperdicio. E boluntarionan a wordo selecciona pa motibo di nan experiencia den liderazgo, organisacion, maneho di autoridad y direccion di hende. Durante e reunion na CMO, nan a ricibi instruccion y un horario pa por garantisa cu e proceso na cada punto por cana den forma ordena.

Deseo pa haci un actividad frecuente

Gobierno tin e deseo pa converti “Dia Nacional pa Cuida Aruba” den un actividad cu por tuma luga regularmente. Hermans a menciona ehempel di otro pais caminda sector priva ta duna empleado un parti di dia liber pa nan por haci trabou comunitario. E aspiracion ta cu, den futuro, tanto Gobierno como sector priva por facilita participacion di nan empleadonan den e actividadnan mensual pa cuida comunidad. Cu cooperacion di Gobierno, e organisacionnan, boluntarionan y henter comunidad, “Ban Cuida Aruba” kier trece un cambio duradero. E mensahe central di e iniciativa ta cla: Aruba ta di nos tur, y ta hunto nos mester cuid’é.

Dia Nacional pa Cuida Aruba

Dia Nacional pa Cuida Aruba ta un iniciativa di Gobierno di Aruba cu ta busca fortalece responsabilidad comparti den cuido di nos isla. Bou di e lema “P’ami. P’abo. Pa nos tur.”, e campaña ta invita ciudadano, empresa, scol, club, fundacion y organisacion pa uni forsa durante un gran accion nacional di limpiesa riba diasabra 25 di juli. Ademas di limpia diferente area rond Aruba, e iniciativa tin como meta crea mas conscientisacion cu cuido di nos entorno ta responsabilidad di nos tur. Un Aruba limpi y bon cuida ta cuminsa cu compromiso y accion di cada ciudadano. Pa mas informacion subi www.arubatanostur.com