Grupo nobo di Paramediconan hayando educacion avanza na Aruba

Team di Curacao a bin join e lesnan na Aruba  

ORANJESTAD (AAN): E esfuerzo pa sigui hisa e nivel di paramediconan na Aruba ta sigui!  Esey ta loke Director Joel Raijnherc di ImSan a indica.

   E cantidad di Paramediconan cu Aruba tabatin, no ta suficiente pa cubri e isla.  Tin varios persona cu a busca forma pa bira Paramedico, pero ora cu nan a bin ripara cu esaki nota e empleo cu nan ta desea, y a retira.

   A keda cu varios Paramediconan kendenan si tin amor pa e trabao y ta haciendo esaki como debe ser.  Pero segun Dr. Raijnherc, tabatin un grupo nobo di enfermero cu a aplica y ta desea di haya mas training pa bira un Paramedico eficiente y cu experticio riba caya durante un emergencia.

   Den pasado: Pa check un biaha mas con e servicio di Ambulans tabata den pasado, aki Dr. Raijnherc a corda riba e dicho di ‘hisa benta’.  Esey esencialmente tabata loke personal di Ambulans tabata haci ora di yega un accident, y e meta tabata pa hiba e pashent lo mas rapido posible pa Hospital.  E tempo ey tabata check cua Ambulancebeambte tin e pia di mas pisa, pa asina e stuur y move mas duro.

   Pero awor tur esaki a cambia!  E esencia awor ta cu bo tin di stabiliza e pashent na e lugar of na cas mes, prome cu bo drenta cune den Ambulans.  Pues e ora bo sa di antemano si acaso ta riesga core cu sirena, of por djis bay cu velocidad normal.

   Formacion moderno: Tabata na aña 2012 cu a duna e prome trayecto di formacion pa personal bira Paramedico di Ambulans.  E formacion aki ta un training cu ta hacibo un enfermero super specializa.

   Pa haci esey na e forma corecto, a percura pa busca educadornan special di Ambulans for di Hulanda y a duna training na tur personal na 2012.  A ripiti esaki dos biaha despues.

   Nan tey bek na Aruba pa di cuatro vez, y ImSan awor tin un grupo di 7 hoben profesional bon entrena, tur di nan ta enfermero y ta cla pa bay pa e siguiente fase di nan educacion y training pa bira un berdadero Paramedico di Ambulans.

   No lubida cu na e momento ey cu un accident grave a socede, of bo a haya un atake cerebral of stroke di curazon, nan ta bira bo wowo, bo mannan, y bo Docter pa yudabo e momento ey, y nan ta riba veld y tin di tuma e decision corecto.

   Pesey nan mester di un educacion hopi halto y hopi specializa, y cada dos aña ta percura pa nan keda haya re-certificacion.

   Segun Dr. Raijnherc, e grupo di 7 hende ta trahando lunanan caba cu ImSan y nan a duna indicacion cu nan ta sigur cu esaki ta loke nan kier, y pesey ta hayando e opleiding aki.

   Ultimo añanan e cantidad di Asistencia cu Ambulans ta dunando, a sigui crece na Aruba.  A bin acerca e yudanza di transporte special di pashentnan cu a bira hopi malo cu Covid-19 na cas, y tin di wordo hiba cu tur medida di seguridad pa Hospital.   Mesun tipo di transporte ta ser haci cu pashentnan di Covid-19 den ICU di Aruba, cu ta wordo manda cu Air Ambulance pa Colombia.

   Apart di esey, a nota un aumento tambe den cantidad di accident di trafico, cu a subi drasticamente.  Aruba dado momento no tabatin suficiente paramedico pa atende nan tur.

   Pesey awor ta organizando e training aki na Aruba, y a probecha tambe pa ricibi personal di Curacao cu a viaha bin aki pa ricibi e training.  Pues asina ta spaar placa y mas hende hunto ta haya e formacion aki.

   Segun Dr. Raijnherc esaki ta un bon noticia!  Seis enfermero special di Curacao lo bin pa haya les, y e ta un colaboracion perfecto.