Grupo grandi di invitado pa apertura oficial di Olive Garden

MetaCorp ta crece atrobe

ORANJESTAD (AAN): “MetaCorp ta creciendo un biaha mas. Despues di siete aña di tabata para, gerencia di MetaCorp a resumi na un iniciativa dinamico di crecimento na final di 2020 (meymey di pandemia) y un biaha mas ta braza e tradicion largo y bon conoci di crecimento”, asina Eddie de Veer, CEO di MetaCorp a cuminsa bisa durante su discurso na ocasion di apertura oficial di Olive Garden den compleho di entretenimento Gloria e siman aki.

   Na e ocasion aki, e hoben Gerard de Veer, nieto di Gerardo de Veer, a corta e sinta cu un sker grandi, para banda di Eddie de Veer, pa hunto duna inicio na operacion oficial di un di e restaurantnan mas conoci den cuminda Italiano-Mericano na Merca. E compania Darden International, operadonan di Olive Garden, a yega na un acuerdo di MetaCorp pa habri e prome restaurant aki na Aruba.

   E iniciativa di crecemento di MetaCorp ta evidente den recien inversion manera: (*) Un inversion substancial den planta di yenamento di cement, awo conoci como Apex. (*) Un inversion substancial den almacena di gas propane, den forma di EcoGas. (*) A adkiri Antillian Soap Company na Curaçao y sigui mehora esaki.

   “Tambe na December 2020 a inaugura e complex maraviyoso aki yama Gloria, na honor di nos prome teatro di pelicula y den celebracion di nos 100 aniversario como e compania priva mas bieu di Aruba”, di acuerdo cu Eddie de Veer.

   Ta cu masha placer el a yama tur presente bonbini na inauguracion di Olive Garden @ Gloria, un bunita adicion nobo n’e coleccion. Pa esunnan cu ta familiarisa cu e cadena internacional bon conoci, lo aprecia hopi caracteristica nobo di e diseño cu e clientenan por disfruta, no solamente den e comedor paden y teraza pafo, pero tambe e cushina ta diseña y ekipa pa cumpli cu tur standard estableci.

   Oliver Garden ta lider di e marca di Darden International, e compania mas grandi di servicio di cuminda cu ta opera den mas di 1.800 localidad. Aruba ta honra cu e presencia di Zach Reams, socio di aprendisahe y desaroyo na Darden Internacional y Roberto Rojas Tejada, director di operacion-franchise na Darden International.

   Hopi empleado y gerencia di Olive Garden @ Gloria a atende training intensivo na Darden Training Center na Orlando, Florida y nan ta ansioso pa mustra clientenan e nivel halto di servicio y e cuminda dushi cu Olive Garden ta conoci p’e. Eyden bo ta sinti comosifuera bo ta na Italia y observa via e bentana e personanan cu ta cana riba acera y e botonan cu ta pasa den e canal di Venecia.

   Olive Garden manera tur otro actividad na Gloria ta propiedad di y ta opera pa MetaCorp via su subsidiario, e cadena E. de Veer Theaters N.V. miho conoci como The Movies. Esaki ta e empresa cuminsa pa e bisawelo di Eddie de Veer na aña 1920 y Gloria tabata nomber di e prome cinema.

   A probecha pa introduci Bas Olde Riekerink, e director ehecutivo nobo di The Movies. El a join e team dia 6 di juni, pero ta na Aruba pa mas di binti aña y a yam’e bonbini na e famia grandi di MetaCorp. E manager di Olive Garden na Gloria ta Amarylis van Boekel.