Grupo di STV damas cu a cuminza na Augustus a finaliza cu exito e prome fase di Trayecto

Jessy Ras, Coordinador, hopi orguyoso:

ORANJESTAD (AAN) – Jessy Ras, Coordinador di e Proyecto Social di Formacion (STV), cu hopi entusiasmo a comparti cu DIARIO, e informacion cu e grupo STV damas cu a cuminza na Augustus, a finaliza nan prome fase di e trayecto.

Esaki ta encera cu pa casi 16 siman largo nan tabata ocupa cu e trayecto, nan tabata den mondi, y nan por wak esaki como un examen, unda nan tin cu demostra kico tur nan a siña durante e prome simannan di nan fase di STV.

“Awe nan a demostra cu nan por. Nan a push, e no tabata facil, tin mas dificil cu otro, pero nan a lucha como grupo y como persona mes, y demostra cu nan a finaliza cu exito nan prome fase di e proyecto”, Jessica Ras a subraya.

El a agrega cu e grupo a bira 11, pasobra un di e hobennan a give up, pero e ta hopi orguyoso di e 11 hobennan cu a finaliza e parti aki di e trayecto cu exito.

Jessica a splica cu cada grupo ta diferente, y nan tin diferente situacion den bida, y e instructornan ta purba di wak con ta yuda nan miho, y asina aki tambe keda mehora e trayecto. “Mi tin cu bisa cu mi ta super contento con e trayecto aki a bay, y di e team di SVT, pasobra nan tambe ta pone hopi enfoke riba esaki, cu hopi pasenshi, dedicacion, keda foi di famia di nan mes, pa por duna e hobennan aki un chens, pa asina nan mehora nan bida”, Jessica Ras a subraya.

Na December nan a cuminza cu e siguiente fase, den cual nan ta haya diferente tipo di curso y na Januari nan lo cuminza cu stage. Nan ta core stage tres biaha pa siman den un compania. Nan ta haya curso manera idioma, computer, “communication skils”,  etc., pa asina nan por finaliza nan trayecto.