Grupo di cursista na Enseñanza pa Empleo a finaliza ‘Supervisor Management’

ORANJESTAD (AAN): Diaranzon anochi na Enseñanza pa Empleo a tuma lugar graduacion di e cursistanan

cu a bira experto awor den Supervisor Management 1 y 2.  Un grupo grandi di cursista a logra finaliza esaki.

   Special pa esaki, Ministro di Enseñanza Gerlien Croes tambe tabata presente.  E docente Ernst Mohammed a splica cu e tabata un curso intensivo, pero hopi di e cursistanan a traha duro y a duna alma y cuerpo pa logra finaliza esaki.  Hopi di nan ta trahando, y ta sacrifica tempo cu famia pa pasa sigui e curso anochi na Enseñanza pa Empleo.

   Mirando e hecho cu nan a traha hopi duro pa finaliza e curso di Supervisor Management 1 y 2, a dicidi na organiza un anochi special di Graduacion.  E ta feliz cu presencia di Ministro, como cu asina e cursistanan ta realiza cu loke nan a haya awor extra na informacion, ta importante pa sigui progresa den nan carera.

   Esaki semper lo duna un hende mas briyo pa sigui bay dilanti.  E curso ta yudabo bay dilanti den trabao.

   Ministro Gerlien Croes tabata orguyoso cu e cursistanan ta busca forma pa bay dilanti den nan carera, y ta net e tipo di oportunidad aki ta loke pais Aruba ta keda ofrece tur ciudadano, pasobra nunca ta laat pa cuminza, of nunca ta laat pa sigui pa formacion di un persona.  Semper tin di keda desaroya nos mes, y esaki no solamente ta un pensamento positivo, pero ta dunabo incentivo pa explora kico mas tin.