Napoleon Bonaparte a duna prueba di abuso di base democratico
*Sumanan enorme ta bay pa militarismo sin bista necesidad humano
*Peliger mas grandi di democracia ta su funcion como trapi politico
ORANJESTAD (AAN) —Libertad, igualdad y fraternidad tabata e tres palabranan determinante den e Revolucion Frances y ta wordo considera como e base di democracia.
Ora bolbe, sinembargo, na e Revolucion Frances, e figura cu mas ta resalta ta di Napoleon Bonaparte, cu a bira inmortal den historia aunke e mes a deshaci di e autenticidad di loke realmente democracia mester ta.
Na e momentonan aki e raza humano, ta pasa den pruebanan grandi pa loke ta trata e autenticidad di regimennan cu ta considera nan mes como democratico.
Kico ta democracia realmente ora tuma nota di e forma cu politiconan na demasiado occasion, ta presenta nan mes como reynan chikito cu a haya un trapi facil pa subi nan nivel social.
E realidad mundial na e momentonan aki, ta sigui mustra dede ariba e revolucion Frances cu a deshaci di cas real pa introduci dirigentenan di Pueblo manera Napoleon, cu na final no a bira Rey pero Emperador.
Kico realmente ta e cara y identidad di politico na e mundo actual, cu ta hambra pa solucion di cantidad di problema cu mester exigi di politica un cara diferente na loke den mayoria di caso ta e hecho.
Si pa eleccion tin tanto atencion pa haya un puesto politico, sigur ta bini dor di e salarionan y entradanan enorme cu durante ultimo decadanan mundo politico ta entrega na politiconan activo cu logra haya un puesto den cual nan mester sirbi Pueblo.
Si tuma nota di e cifranan mara na pago di politiconan rond mundo, cu ta haya oportunidad di asumi e posicionnan gubernamental, e pregunta ta surgi si de facto den e situacion mundial actual, politiconan no tin mas bien e cara di Emperador manera Napoleon cu e cara di sirbidor cu nan mester tin.
E exigencianan na politiconan den funcion mester aumenta den un mundo cu mester prepara su mes pa problemanan serio cu ta bati na porta.
Na e momento aki por mira atrobe con sumanan enorme ta alimenta industria di guera cu ya durante basta aña ta wordo alimenta dor di descubrimento di armanan mortal cada bez mas eficaz.
Esaki ta conduci awor na e pregunta serio, kico politica realmente ta sirbi na mundo, cu a introduci e sistema politico pa garantisa cu su representantenan cu mester sirbi y duna contenido na democracia, ta cumpli cu nan trabou y no cu elevacion di nan persona cu participacion na e sistema politico.
E situacion mundial cada rato ta mas serio y cu esaki e tension di e ser humano, cu ya mester confronta un naturaleza abusa.
Con e sistema politico na e momentonan aki ta sirbi mundo? Politica ta sirbi Pueblo of ta bira e grupo nobo cu ta considera su mes elitario, pasobra e tin poder den su man?
Un pregunta serio cu mester wordo analisa pa por papia di democracia, cu no ta visibel den e situacion mundial, den cual miseria humano ta sigui aumenta y no ta haya e atencion cu democracia ta rekeri.
Democracia ta e herment pa sirbi Pueblo y no pa crecemento personal individual y creacion di grupo elitario nobo pa cual Pueblo mester paga sin cu mundo ta soluciona e problemanan humano cu ta causa tanto miseria y dolor na nivel internacional!
